आगामी काळात पाच राज्यात विधानसभा निवडणुका होणार आहेत. या निवडणुकांमध्ये भाजपला पराभूत करण्यासाठी इंडिया आघाडींनं रणनीती आखलीय. दुसरीकडे या राज्यांमध्ये आपली सत्ता आणण्यासाठी भाजपनेही मोठी तयारी सुरू केलीय. त्यापार्श्वभूमीवर प्रत्येक राज्यातील आमदारांवर नवंनवीन मिशन देत आहे. हरियाणातील ४८ आमदारांनाकडे पीएम मोदींनी नवी मिशनची जबाबदारी दिलीय.

पंतप्रधान नरेंद्र मोदी यांनी शनिवारी हरियाणातील भाजप आमदारांशी बैठक घेतली. या बैठकीत सोशल मीडियाचा वापर आणि सेंद्रिय शेती यांसारख्या विविध मुद्द्यांवर चर्चा झाली. तसेच जुन्या आठवणींनाही उजाळा देण्यात आला. मात्र, या बैठकीतून आणखी एक महत्त्वाचा संदेश देण्यात आलाय. भाजपने आपलं लक्ष आता पंजाबमधील निवडणुकांवर केंद्रित केलंय. सूत्रांच्या माहितीनुसार, हरियाणातील भाजपचे बहुतांश आमदार पंजाबमधील प्रचार मोहिमेची धुरा सांभाळू शकतात.

हरियाणातील भाजप आमदार पंजाबमध्ये करणार प्रचार

सूत्रांच्या माहितीनुसार, हरियाणातील भाजपचे बहुतांश आमदार आणि नेत्यांना पंजाबमध्ये तैनात केले जाऊ शकते. त्यांना विविध विधानसभा मतदारसंघांची जबाबदारी सोपवली जाण्याची तसेच बूथ स्तरावरील कामेही दिली जाण्याची शक्यता आहे. पंजाबमधील मतदारांसमोर हरियाणातील 'गव्हर्नन्स मॉडेल' (प्रशासकीय कार्यपद्धती) सादर करण्याची तयारी भाजप करत आहे. या रणनीतीचाच एक भाग म्हणून, मुख्यमंत्री नायब सिंग सैनी यांनी या राज्याच्या वारंवार भेटी देण्यास आधीच सुरुवात केली आहे.

गेल्या वर्षभरात नायब सिंग सैनी यांनी पंजाबमधील सुमारे ९० कार्यक्रमांमध्ये सहभाग घेतलाय. २०२७ च्या निवडणुकांपूर्वी पंजाबमध्ये भाजपचा जनसंपर्क वाढवण्याच्या मोहिमेचे ते नेतृत्व करत आहेत. पंजाबमध्ये सैनी एका वेगळ्याच रूपातही दिसून आले होते. त्यांनी तिथे पगडी परिधान करत विविध धार्मिक स्थळांना भेटीही दिल्या आहेत.

पंजाब भाजपमध्ये त्यांना अनेकदा 'सरदार नायब सिंग सैनी' असे संबोधले जाते. पंजाबमध्ये भाजपचे सरकार स्थापन करण्याबाबत नायब सिंग सैनी यांनी अलीकडेच एक ठाम विधान केलंय. पंतप्रधान नरेंद्र मोदींच्या 'विकसित भारत' या संकल्पनेच्या धर्तीवर 'विकसित पंजाब' घडवण्याचे प्रयत्न केले जातील, असे त्यांनी सांगितले. तसेच, हरियाणामधील कल्याणकारी योजना पंजाबमध्येही राबवल्या जातील, असेही सैनी यांनी म्हटलंय.