आई मुलीच्या नात्याला काळिमा फासणारी घटना गुजरातमधील राजकोटमधून समोर येत आहे. वंशाच्या दिव्यासाठी आईनं पोटच्या लेकीला संपवलं. स्वयंपाकघरातील पाण्याच्या टाकीत बुडवून आईनं २ महिन्यांच्या चिमुकलीचा जीव घेतला. आधी चिमुकली बेपत्ता झाली असल्याची माहिती समोर आली होती. मात्र, पोलीस तपासानंतर ही धक्कादायक बाब उघडकीस आली. या प्रकरणी महिलेच्या पतीनं दाखल केलेल्या तक्रारीनुसार पोलिसांनी गुन्हा दाखल केला असून, पुढील तपास सुरू आहे.

मुस्कान कयानी असे आरोपी महिलेचे नाव आहे. तर, साजिद कयानी, असं तक्रारदार पतीचे नाव आहे. हे संपूर्ण प्रकरण कोटडा सांगणी पोलीस ठाण्याच्या हद्दीत घडली आहे. व्यवसायाने कामगार असलेल्या साजिदनं पोलिसांना सांगितले की, मुस्कानचे सहा वर्षांपूर्वी लग्न झाले होते. त्यांना सहा वर्षांची नूरेना नावाची मोठी मुलगी आहे.

कौटुंबिक कलहामुळे साजिद आणि मुस्कान त्यांच्या पालकांपासून वेगळे राहत होते. काही महिन्यांपूर्वी त्यांची दुसरी मुलगी आयेशा जन्माला आली. घटनेच्या दिवशी साजिद सकाळी ८ वाजेच्या कामाला गेला होता. सायंकाळी मुस्कानने साजिदला फोन केला होता.

२ वर्षांची चिमुकली आयेशा पाळण्यावरून बेपत्ता झाली असल्याची माहिती दिली. हे ऐकताच साजिदला धक्का बसला. त्यानं ताबडतोब पालकांना याची माहिती दिली. त्यांनी घराकडे धाव घेतली. तसेच बाळाचा शोध घेऊ लागले. शोध सुरू असताना स्वयंपाकघरातील पाण्याच्या टाकीत आयेशाचा मृतदेह आढळला.

कुटुंबियांनी तिला तातडीने रूग्णालयात नेले. परंतु, डॉक्टरांनी तिला मृत घोषित केले. काही दिवसांनंतर साजिदला मुस्कानवर संशय येऊ लागला. त्यानं मुस्कानला माहेरी धाडलं. काही दिवसानंतर मुस्कानच्या भावाने साजिदला आयेशाविषयी हकीकत सांगितली. मुस्कानने माहेरी कबुली दिली. मुलगा हवा होता, यामुळे आयेशाची हत्या केली, असं तिनं सांगितलं.

सुरूवातीला साजिदनं पोलिसांकडे जाण्याऐवजी मुस्कानकडे घटस्फोटाची मागणी केली. यानंतर मु्स्काननं थेट पोलिसांकडे धाव घेतली. तसेच साजिदविरोधात तक्रार दाखल केली. खोट्या आरोपांमुळे त्रस्त झालेल्या साजिदनं अखेर पोलिसांना सगळं खरं सांगितलं. साजिदच्या तक्रारीवरून पोलिसांनी मुस्कानविरोधात तक्रार दाखल केली आहे.