गुजरातची राजधानी अहमदाबादमध्ये उच्चभ्रू सोसायटीतील एका खोलीत २५व्या वाढदिवसानिमित्त जंगी पार्टी सुरू होती. या पार्टीत तब्बल ८१ जणांचा समावेश होता. त्यामध्ये ३८ महिला आणि ४३ पुरुष उपस्थित होते. डीजेच्या गाण्यावर पाहुणे मंडळी थिरकत होती, दारू आणि हुक्काचा धूर घरभर पसरला होता, इतक्यात पोलिसांनी एंट्री केली आणि सगळचं उध्वस्त केलं.

पोलिसांना अहमदाबादमध्ये बुधवारी सानंद परिसरातील निर्वाणा ग्रीन्स वीकेंड होम्स येथे होणाऱ्या अवैध पार्टीची गुप्त माहिती मिळाली होती. या गुप्त माहितीवरून पोलीस सापळा रचत ठरलेल्या ठिकाणी पोहचले. पार्टी रूमच्या आत प्रवेश करताच पोलिसांना जेवणाची मांडणी, केक, ११ टेबल, तसेच परदेशी दारू आणि हुक्क्यांची स्वतंत्र व्यवस्था दिसून आली.

पार्टीतील बहुतांश पाहुण्यांचे वय ३५ ते ४५ दरम्यान होते. पोलिसांनी छापा टाकताच एकच गोंधळ उडाला आणि अनेक जण पळण्याचा प्रयत्न करत होते. मात्र कानून के हात लंबे होते है, पोलिसांनी पार्टीत उपस्थित सगळ्यांना ताब्यात घेतले. या बेकायदेशीर पार्टीत परदेशी दारूच्या अनेक बाटल्या, १० हून अधिक हुक्का पाइप्स, तसेच कार्यक्रमस्थळी उभ्या असलेल्या २० पेक्षा जास्त लक्झरी गाड्या जप्त केल्या. या सर्व व्यवस्थांवरून हा कार्यक्रम अत्यंत नियोजनबद्ध पद्धतीने आयोजित करण्यात आल्याचे स्पष्ट होत असून, शहरातील श्रीमंत आणि प्रभावशाली लोकांसाठीच ही पार्टी असल्याचे पोलिसांचे म्हणणे आहे.

सानंद पोलिसांच्या माहितीनुसार, पुरुषांना ताब्यात घेऊन वैद्यकीय तपासणीसाठी सरकारी रुग्णालयात नेण्यात आले, तर महिलांना कायदेशीर नोटीस देऊन सोडण्यात आले आहे. उपस्थितांमध्ये धनाढ्य कुटुंबातील वारसदार, तसेच वैद्यकीय आणि रिअल इस्टेट क्षेत्रातील प्रभावशाली व्यक्ती असल्याने पोलीस ठाण्यात रात्री उशिरापर्यंत हाय-व्होल्टेज ड्रामा पाहायला मिळाला. या प्रकरणाचा तपास आता अधिक तीव्र करण्यात आला आहे. बेकायदेशीर दारू आणि हुक्क्यांचा पुरवठा कुठून झाला, तसेच या पार्टीचा मुख्य आयोजक कोण होता, याचा शोध पोलीस घेत आहेत.