Heart Attack Death Viral Video : गेल्या काही आठवड्यांमध्ये देशात हृदयविकाराच्या झटक्याने अनेकाचे मृत्यू झाल्याच्या घटना उघडकीस आल्या आहेत. यासंदर्भातील अनेक धडकी भरवणारे व्हिडिओ इंटरनेटवर समोर आले आहेत. कुणाचा नाचताना, कुणाचा दांडिया खेळताना, तर कुणाला भर मंडपात हार्ट अटॅक आल्याच्या घटना घडल्या आहेत. तरुणांपासून ते वृद्धापर्यंत कुणालाही हार्ट अटॅक येताना दिसत आहे. (Breaking Marathi News)

गुजरातमधील वलसाड येथे असाच एक प्रकार घडला आहे. एक व्यक्ती दुचाकीवर बसून आपल्या वडिलांसोबत गप्पा मारत होता. तेव्हा बोलता-बोलता तो अचानक दुचाकीसह जमिनीवर कोसळला. वडिलांनी त्याला तातडीने उपचारासाठी रुग्णालयात दाखल केलं. मात्र, त्यापूर्वीच या व्यक्तीचा मृत्यू झाला होता.

या थरारक घटनेचा व्हिडीओ (Viral Video) देखील समोर आला आहे. व्हिडीओ पाहून अनेकांना धडकी भरली आहे. दीपक भंडारी (वय ५२ वर्ष) असं मृत्युमुखी पडलेल्या व्यक्तीचे नाव आहे. दीपक यांच्या अचानक निघून जाण्याने भंडारी कुटुंबीयांवर दु:खाचा डोंगर कोसळला आहे.

मिळालेल्या माहितीनुसार, दीपक भंडारी हे दीव-दमण येथे राहतात. त्यांचे देवक परिसरात हॉटेल आहे. बुधवारी सकाळी नेहमीप्रमाणे ते हॉटेलमध्ये गेले. कर्मचाऱ्यांशी गप्पा मारल्यानंतर ते बाहेर आले. दरम्यान, दुचाकीवर बसून वडिलांसोबत गप्पा मारत असताना अचानक दीपक हे खाली कोसळले.

त्यानंतर वडिलांनी त्यांना हॉटेल कर्मचाऱ्यांच्या मदतीने जवळच्या रुग्णालयात नेले. मात्र, तेथे डॉक्टरांनी त्यांना मृत घोषित केले. हृदयविकाराच्या झटक्याने (Heart Attack) मृत्यू झाल्याची माहिती डॉक्टरांनीही दिली आहे. दरम्यान, अंगावर काटा आणणारी ही संपूर्ण घटना हॉटेलमध्ये लावण्यात आलेल्या सीसीटीव्ही कॅमेऱ्यात कैद झाली आहे. अचानक झालेल्या या घटनेमुळे सर्वांनाच धक्का बसला आहे.

Edited By - Satish Daud