अहमदाबाद : 1993 साली मुंबईत झालेल्या बॉम्बस्फोट (Mumbai Bomb Blast) प्रकरणात गुजरात एटीएसने मोठी कारवाई केली आहे. या बॉम्बस्फोट प्रकरणातील फरार आरोपींच्या गुजरात एटीएसने (Gujarat ATS) मुसक्या आवळल्या आहेत. अबू बकर, युसुफ भटाका, शोएब बाबा आणि सैय्यद कुरेशी अशी अटक करण्यात आलेल्या आरोपींची नावे आहेत. (Gujarat ATS Arrests Four Accused In The 1993 Mumbai Serial Blasts Case)

अटक करण्यात आलेले चारही आरोपी हे अंडरवर्ल्ड डॉन दाऊद इब्राहिम याचे हस्तक आहेत. एटीएसने अत्यंत शिताफीने चारही आरोपींना अहमदाबाद येथून अटक केली आहे. 1993 साली मुंबईत बॉम्बस्फोट झाला होता. या बॉम्बस्फोटानंतर हे चारही आरोपी विदेशात पळून गेले होते. तेव्हापासून पोलीस त्यांच्या शोधात होते.

दरम्यान, चारही आरोपी बनावट पासपोर्टच्या आधारे नाव बदलून अहमदाबाद येथे आले असल्याची गुप्त माहिती एटीएसला मिळाली होती. या माहितीनंतर सापळा रचत एसटीएसने या चारही आरोपींच्या मुसक्या आवळल्या आहेत. गुजरात एटीएसने केलेली कारवाई ही मोठी कारवाई असल्याचं मानलं जात आहे.