गोवा नाईटक्लब येथील काल लागलेल्या आगीच्या घटनेमुळे सर्वत्र खळबळ उडाली. या आगीत होरपळून एकूण २५ जणांचा मृत्यू झाला असल्याची माहिती आहे. ज्यात दिल्लीतील एका कुटुंबातील चार सदस्यांचा देखील समावेश आहे. एका बहिणीला धगधगत्या आगीच्या मुखातून बाहेर काढण्यासाठी दोघींनी आगीत उडी घेतली. परंतु, तिघांचा जागीच मृत्यू झाला. या घटनेनंतर कुटुंबावर दुखा:चा डोंगर कोसळला आहे.

मिळालेल्या माहितीनुसार, मृतांमध्ये ३ बहिणींचा समावेश होता. अनिता, कमला आणि सरोज जोशी या तिघींचा आगीत होरपळून मृत्यू झाला. तर, भावना जोशी यांचे पती विनोद कुमार यांचेही निधन झाले. भावना जोशी यांचे अपघातातून प्राण वाचले. २ मृतदेहांची ओळख पटवणे पोलिसांना कठीण जात आहे. सध्या मृतदेहांना शवविच्छेदनासाठी रूग्णालयात पाठवण्यात आले आहे.

कुटुंबियांच्या शेजारचे म्हणाले की, 'या बहिणींच्या आईची तब्येत बिघडली आहे. त्यामुळे त्यांना मुलींच्या मृत्यूबाबत माहिती देण्यात आली नाही. आम्हाला माहित आहे की, ही महिला हा धक्का सहन करू शकणार नाही'. शेजाऱ्यांनी माहिती दिली की, घटनेच्या दिवशी रात्री ते नाईट क्लबमध्ये जेवायला गेले होते. आग लागण्याच्या आधी ते जेवण करुन बाहेर निघत होते. मात्र, सर्वजण आगीच्या भक्ष्यस्थानी सापडले'.