रोहित कदम, साम टीव्ही

पेपरफुटी प्रकरणात केंद्रीय शिक्षणमंत्री धर्मेंद्र प्रधानांच्या राजीनाम्यामुळे कॉक्रोच जनता पार्टी म्हणजेच सीजेपीच्या आंदोलनाला मोठं यश मिळालं. आता तरुणाईनं इथेनॉल मिश्रित पेट्रोलच्या मुद्द्याकडे मोर्चा वळवल्याचं दिसतंय. नीट पेपरफुटी प्रकरणी ज्या ठिकाणी विद्यार्थ्यांनी आंदोलनं केली, त्या ठिकाणी आता इथेनॉलवरून निदर्शने केली जात आहेत. विशेष म्हणजे इथेनॉलविरोधात लढा देण्यासाठी थेट E20 जनता पार्टीची स्थापना करण्यात आलीय. E 20 जनता पार्टीच्या मागण्या नेमक्या काय आहेत? ते पाहुयात...

E20 जनता पार्टी'च्या मागण्या

E20 ऐवजी 100 टक्के शुद्ध पेट्रोल निवडण्याचा पर्याय द्या

इथेनॉल मिश्रित इंधन असल्यास, ते स्वस्त दरात द्या

पंपांवर इथेनॉलच्या प्रमाणाचे फलक लावावेत

त्यामुळे जेनझीचा मूड पाहून विरोधकांनीही इथेनॉलचा मुद्दा हातात घेतलाय. ठाकरेबंधूंनी शिवाजी पार्कातल्या अभिनंदन सभेत पुढचा विषय इथेनॉलचा आहे, असं म्हणत उद्धव ठाकरेंनी नाव न घेता अप्रत्यक्षपणे नितीन गडकरींना इशाराच दिला. तर काँग्रेस प्रदेशाध्यक्ष हर्षवर्धन सपकाळ यांनी थेट गडकरींचं नाव घेत राजीनाम्याची मागणी केली...

दरम्यान, इथेनॉल मिश्रित पेट्रोलमुळे संतप्त झालेल्या दिल्ली टॅक्सी असोसिएशननं येत्या 4 ऑगस्टला संसदेवर मोर्चा काढण्याची घोषणा केलीये. तर दुसरीकडे, इथेनॉलच्या मुद्य्यावरून विरोधकही सरकारविरोधात आक्रमक झाले आहेत. त्यामुळे सीजेपीच्या धर्तीवर जन्माला आलेली E20 जनता पार्टी मोदी सरकारमधील आणखी एका मंत्र्याची विकेट काढणार का? याची उत्सुकता निर्माण झालीये.