Dating App Scam News : समलिंगी डेटिंग अ‍ॅपचा वापर फसवणूक करणाऱ्या टोळीला पोलिसांनी अटक केली आहे. आरोपी सुरुवातीला अ‍ॅपवरुन लोकांशी ओळख करत, नंतर त्यांचे गुप्तपणे चित्रीकरण करत आणि पुढे त्या चित्रीकरणावरुन ब्लॅकमेल करत होते. गाझियाबाद पोलिसांनी खास ऑपरेशन करुन या टोळीला जेरबंद केले आहे.

एका पीडित व्यक्तीने समलिंगी डेटिंग अ‍ॅपवरुन फसवणूक झाल्याची तक्रार केल्यानंतर हे प्रकरण उघडकीस आले. 'आरोपींनी ग्राइंडर (Grindr) या समलिंगी डेटिंग अ‍ॅपवरुन माझ्याशी संपर्क साधला. बोलणं सुरु झाल्यावर एका भाड्याच्या फ्लॅटमध्ये भेटायला बोलावले. पुढे फ्लॅटमध्ये पीडिताचे चित्रीकरण केले आणि त्यावरुन ब्लॅकमेल करत माझ्याकडून १.४ लाख रुपये उकळले', अशी माहिती पीडित व्यक्तीने पोलिसांना दिली.

सहाय्यक पोलीस आयुक्त स्वतंत्र कुमार सिंह यांनी दिलेल्या माहतीनुसार, या टोळीला पकडण्यासाठी गुप्तचरांच्या मदतीने एक विशेष ऑपरेशन करण्यात आले. एनडीआरएफ रोडजवळ आरोपींना अटक करण्यात आली. टोळीचा रिंकू, अजय आणि शुभम या तिघांना गाझियाबाद पोलिसांनी ताब्यात घेतले आहेत. तसेत दोन आरोपी अजूनही फरार आहे.

या टोळीचा सूत्रधार रिंकू होता, तर अजय पीडितांना प्रलोभन दाखवून फसवत असल्याचे पोलिसांनी सांगितले. पोलिसांनी रिंकूकडून तीन मोबाईल फोन, दहा हजार रुपये रोख रक्कम आणि ओळखपत्रे जप्त केली आहे. पीडितांना ब्लॅकमेल करत असलेली ही टोळी २ जानेवारीपासून भाड्याच्या फ्लॅटमध्ये राहत होती.