पंजाब बटाला येथील कादियन रोडवरील एका बेकरीजवळ गँगस्टर जग्गू भगवानपुरियाची आई आणि त्याच्या बॉडीगार्डची गोळ्या झाडून हत्या करण्यात आली. या घटनेनंतर अज्ञात आरोपी दुचाकीवरून फरार झाले. ही संपूर्ण घटना सीसीटीव्हीत कैद झाली असून, प्राथमिक माहितीनुसार ही हत्या गँगवॉरशी संबंधित असल्याचं सांगितलं जात आहे. दविंदर बंबीहा टोळीने या हत्येची जबाबदारी स्वीकारली असून, घटनेनंतर परिसरात काही काळ तणावाचं वातावरण निर्माण झालं.

नेमकं घडलं काय?

रात्री १०:४५ च्या सुमारास दोन अज्ञात हल्लेखोर दुचाकीवरून आले आणि त्यांनी स्कॉर्पिओ कारमध्ये बसलेल्या गँगस्टर जग्गू भगवानपुरियाच्या आई हरजीत कौर आणि बॉडीगार्ड करणवीर सिंग यांच्यावर गोळीबार केला. हल्ल्यानंतर आरोपी घटनास्थळावरून फरार झाले. गोळी लागल्यामुळे करणवीर सिंगचा जागीच मृत्यू झाला, तर गंभीर जखमी झालेल्या हरजीत कौर यांचा रुग्णालयात नेत असताना मृत्यू झाला.

पोलिसांनी अज्ञात आरोपींविरोधात गुन्हा दाखल केला असून, सीसीटीव्ही फुटेजच्या आधारे तपास सुरू आहे. या घटनेचा संबंध गँगवॉरशी असल्याचे स्पष्ट झाले असून, पोलिसांकडून पुढील तपास सुरू आहे.

गँगस्टर जग्गू भगवानपुरिया नक्की कोण आहे?

जग्गू भगवानपुरियाचं खरे नाव जसदीप सिंग आहे. दहावीपर्यंत शिक्षण घेतल्यानंतर तो गुन्हेगारी प्रवृत्तीकडे वळला. शाळा आणि परिसरात तो गुंडगिरी करायला लागला. त्याच्याविरुद्ध आतापर्यंत अनेक एफआयआर नोंदवले गेले आहेत. ध्यानपूरमधील एका हत्या प्रकरणात त्याचं नाव समोर आलं होतं, त्यानंतर तो गुन्हेगारी जगतात सक्रिय झाला. सध्या त्याच्यावर २६ गुन्हे दाखल असून, तो तुरुंगात आहे.