Shibu Soren passes away : झारखंडचे माजी मुख्यमंत्री आणि झारखंड मुक्ति मोर्चा (JMM) चे संस्थापक संरक्षक शिबू सोरेन यांचे आज सकाळी (सोमवार, ४ ऑगस्ट २०२५) निधन झाले. दिल्लीतील सर गंगाराम रुग्णालयात त्यांच्यावर गेल्या काही दिवसांपासून उपचार सुरू होते. वयाच्या ८१व्या वर्षी शिबू सोरेन यांनी अखेरचा श्वास घेतला. शिबू सोरेन गेल्या काही काळापासून किडनीच्या संबंधित आजाराने त्रस्त होते. जून महिन्याच्या शेवटच्या आठवड्यात त्यांना रुग्णालयात दाखल करण्यात आले होते. शिबू सोरेन यांच्यावर गेल्या काही दिवसांपासून उपचार सुरू होते, मात्र प्रकृती खालावल्याने त्यांची प्राणज्योत मालवली. (Shibu Soren death news update)

शिबू सोरेन यांचे पुत्र आणि झारखंडचे विद्यमान मुख्यमंत्री हेमंत सोरेन यांनी सोशल मीडियावर निधनाची माहिती दिली. हेमंत सोरेन यांनी आपल्या भावना व्यक्त करताना लिहिले, “आदरणीय दिशोम गुरुजी आम्हा सर्वांना सोडून गेले. आज मी शून्य झालो आहे.” शिबू सोरेन यांच्या मृत्यूनंतर झारखंडवर शोककळा पसरली आहे. (Former Jharkhand CM Shibu Soren passes away in Delhi)

शिबू सोरेन यांनी झारखंडच्या राजकारणात आणि आदिवासी समाजाच्या उत्थानासाठी महत्त्वपूर्ण योगदान दिले. JMM च्या माध्यमातून त्यांनी आदिवासींच्या हक्कांसाठी आणि झारखंडच्या स्वातंत्र्यलढ्यासाठी संघर्ष केला. शिबू सोरेन यांच्या निधनाने झारखंडसह देशभरात शोककळा पसरली आहे.

शिबू सोरेन (जन्म: ११ जानेवारी १९४४ - मृत्यू: ४ ऑगस्ट २०२५) हे झारखंड मुक्ति मोर्चाचे संस्थापक आणि भारतीय राजनेता होते. ते तीन वेळा झारखंडचे मुख्यमंत्री आणि केंद्रात कोळसा मंत्री राहिले आहेत. दुमका लोकसभा मतदारसंघातून आठ वेळा खासदार आणि तीन वेळा राज्यसभा सदस्य होते. आदिवासी हक्कांसाठी आणि स्वतंत्र झारखंड राज्याच्या चळवळीत त्यांचे मोलाचे योगदान होते. त्यांना ‘दिशोम गुरु’ म्हणून संबोधले जायचे. दीर्घ आजारानंतर त्यांचे दिल्लीतील गंगाराम रुग्णालयात निधन झाले.