Dubai's Al-Ras apartment Fire News : संयुक्त अरब अमिरातीमधील (UAE) दुबईमध्ये एका निवासी इमारतीला भीषण आग लागल्याची घटना घडली आहे. ही आग एवढी भयंकर होती की त्यात 16 जणांचा होरपळून मृत्यू झाला आहे. या घटनेत मृत्यूमुखी पडलेल्यांमध्ये चार भारतीयांचा समावेश आहे.

दुबईच्या अधिकाऱ्यांनी दिलेल्या माहितीनुसार, या अपघातात 16 जणांचा मृत्यू झाला असून नऊ जण गंभीर जखमी झाले आहेत. दुबईतील भारतीय वाणिज्य दूतावासाने या अपघातात चार भारतीयांचा मृत्यू झाल्याची पुष्टी केली आहे.

यात केरळमधील एका जोडप्यासह चार भारतीयांचा समावेश आहे. दुबईतील सर्वात जुन्या भांगांपैकी एक असलेल्या अल-रास येथील निवासी इमारतीच्या चौथ्या मजल्यावर आग लागली आणि नंतर ती इतर भागातही पसरली.

भारतीय वाणिज्य दूतावासातील वरिष्ठ अधिकारी बिजेंद्र सिंह यांनी सागितले की, "मृतांमध्ये रिजेश कलंगदान, त्यांची पत्नी जेशी कंदमंगलथ, गुडू सलियाकुंडू आणि इमामकासिम अब्दुल खदेर यांचा समावेश आहे. त्याच्या पासपोर्टच्या प्रती आम्हाला मिळाल्या आहेत. आम्ही पीडितांच्या कुटुंबियांबद्दल संवेदना व्यक्त करतो आणि समर्थनासाठी पोहोचलेल्या सामाजिक कार्यकर्त्यांचे आणि इतरांचे आभार मानतो. त्यांचे मृतदेह परत आणण्यासाठी आम्ही स्थानिक अधिकाऱ्यांशी समन्वय साधत आहोत".

अधिकाऱ्यांनी दिलेल्या माहितीनुसार, दुबई सिव्हिल डिफेन्स ऑपरेशन्स रूमला शनिवारी दुपारी 12.35 च्या सुमारास आग लागल्याचा कॉल आला, त्यानंतर दुबई सिव्हिल डिफेन्स मुख्यालयातील एक टीम घटनास्थळी दाखल झाली आणि इमारतीतील रहिवाशांना बाहेर काढण्यास सुरुवात केली.

आतापर्यंत तामिळनाडूतील दोन पुरुष आणि केरळमधील एक जोडप्यांसह चार भारतीय, तीन पाकिस्तानी भाऊ आणि इमारतीत काम करणाऱ्या नायजेरियन महिलेची ओळख पटली आहे.