भाजप नेते आणि केंद्रीय मंत्री नितीन गडकरी यांच्याविरोधात राजकारण केलं जातंय. याबाबत खुद्द मंत्री गडकरींनी खुलासा केलाय. माझ्याविरोधात राजकारण केलं जात आहे. पेड कॅम्पेन चालवलं गेलं असा धक्कदायक खुलासा हायवे मॅन नितीन गडकरी यांनी केलाय.नितीन गडकरी पंतप्रधान मोदींच्या मंत्रिमंडळातील धडाधडीचे आणि परखड मत मांडणारे नेते आहेत. परंतु त्यांनाच कोणीतरी चक्रव्यूहात अडकवू पाहत आहे.

गेल्या काही दिवसांपासून इथेनॉल ब्लेंड फ्यूलबाबत मोठी चर्चा सुरू झालीय. देशभरात अनेकांनी वेगवेगळ्या प्लॅटफॉर्मवर इथेनॉलबाबत धक्कादायक दावा केला होता. इथेनॉलच्या वापरामुळे वाहनांमध्ये खराबी येत असून मायलेज आणि फरफॉर्मेंस कमी होत असल्याचा दावा अनेकांनी केला होता.

दुसरीकडे इथेनॉलचा वापर करण्यात यावा असे आवाहन नितीन गडकरीकडून करण्यात येत होतं. पण वाहनांमधील खराबीमुळे नागरिकांकडून विरोध केला जातोय. काहीजणांकडून थेट गडकरींवर टीका केली जात होती. त्याबाबत केंद्रीय रस्ते वाहतूक आणि राजमार्ग मंत्री नितीन गडकरींनी उत्तर दिलंय.

नितीन गडकरी हे दिल्लीत आयोजित करण्यात आलेल्या सोसायटी ऑफ इंडियन ऑटोमोबाईल मॅन्यूफॅक्चर्स च्या ६५ व्या वार्षिक समारंभात बोलत होते. सोशल मीडियावर आपल्याविरोधात एक राजकीय कॅम्पेन चालवण्यात आलं होतं, त्याचा आपण शिकार झालो होतो. E20 पेट्रोल, ज्यात पारंपारिक इंधनासह २० टक्के इथेनॉल मिश्रित केले जाते. त्यावरून काही चिंता व्यक्त करत होते, परंतु ते अवाजवी चिंता व्यक्त करत होते, असा दावा गडकरींनी केला.

हे इंधन सुरक्षित असून नियामक आणि ऑटोमोबाईल उत्पादक या दोघांचाही त्याला पाठिंबा आहे. ARAI आणि सर्वोच्च न्यायालयाने E20 कार्यक्रमाबद्दल संपूर्ण स्पष्टता दिलीय. मला राजकीयदृष्ट्या लक्ष्य करण्यासाठी सोशल मीडियावर एक मोहीम चालवण्यात आली. ते एक पेड कॅम्पेन होतं. त्यामुळे मी त्याकडे लक्ष देत नाही, असेही नितीन गडकरी म्हणाले.