उत्तरप्रदेशातील लखीमपूर मैगलगंजच्या मुख्य चौकात भीषण अपघाताची घटना घडली. डबल डेकर बसने अचानक पेट घेतला. या भीषण आगीत डबल डेकर जळून खाक झाली. मात्र, सुदैवाने जीवितहानी टळली. पण काही प्रवासी जखमी असल्याची माहिती आहे. मिळालेल्या माहितीनुसार, ही बस दिल्लीहून सीतापूरच्या दिशेनं जात होती. याचदरम्यान, डबल डेकर बसने पेट घेतला. या बसमधून ७० प्रवासी प्रवास करत असल्याची माहिती आहे. सर्व प्रवाशांना वेळेत बसबाहेर काढण्यात आले. काही प्रवासी जखमी असल्याची माहिती आहे.

प्रत्यक्षदर्शींच्या म्हणण्यानुसार, डबल डेकर बस दिल्लीहून सीतापूरच्या दिशेनं जात होती. लखीमपूर येथील मगलगंज चौकात बस काही वेळ थांबली होती. प्रवासी अल्पोपहार करण्यासाठी थांबली होती. तेव्हा अचानक बसच्या मागून धूर येऊ लागला. काही क्षणातच आगीनं रौद्ररूप धारण केलं. स्थानिकांनी तातडीने घटनास्थळी धाव घेतली. तसेच प्रवाशांना मदत केली. सर्वांना सुरक्षितपणे बाहेर काढली.

बचावकार्य सुरू असताना काही प्रवासी जखमी झाले. त्यांना तातडीने खासगी रूग्णालयात उपचारासाठी दाखल करण्यात आले. आग इतकी भीषण होती की, अग्निशमन दलाचे जवान येण्याआधीच दीड तासानंतर बस पूर्णपणे जळून खाक झाली. आगीत प्रवाशांचे सामान जळून खाक झाले.

प्राथमिक अंदाजानुसार, आगीचे कारण शॉर्ट सर्किट किंवा फटाके असू शकते. दरम्यान, बसमध्ये पेट्रोमॅक्स सिलिंडर देखील आढळून आला आहे. या घटनेची माहिती मिळताच पोलिसांनी घटनास्थळी धाव घेतली. तसेच कारवाईला सुरूवात केली आहे. निरीक्षक रविंद्र पांडे यांनी सांगितले की, आग शॉर्ट सर्किटमुळे लागली असावी. सर्व प्रवाशांना सुरक्षितस्थळी हलवण्यात आलं आहे. या प्रकरणाची चौकशी सुरू आहे.