Delhi crime news : दिल्लीच्या कालकाजी मंदिर परिसरात हत्येची घटना घडली आहे. प्रसादावर झालेल्या मारहाणीत सेवादाराची मृत्यू झाला. सेवादाराच्या हत्येनंतर परिसरातील भाविकांमध्ये खळबळ उडाली.

मंदिरात मारहाणीची घटना घडल्यानंतर पोलीस घटनास्थळी पोहोचले. पोलिसांनी तातडीने सेवादाराला एम्स ट्रॉमा रुग्णालयात दाखल केले. मंदिरातील सेवादाराला आरोपी तरुणांनी बेदम मारहाण करत जखमी केलं. त्यानंतर पोलिसांनी आरोपीच्या विरोधात एफआयआर नोंदवून अटक केली.

तरुणांनी २९ ऑगस्ट रोजी रात्री ९.३० वाजता सेवादाराला मारहाण केली. या हल्ल्यात मृत्यू झालेले योगेंद्र सिंह(३५) हे हरदोई येथील उत्तर प्रदेशात राहत होते. मागील १५ वर्षांपासून योगेंद्र हे सेवादार म्हणून काम करत होते. या हत्या प्रकरणी पोलिसांनी ३० वर्षीय अतुल पांडे यांना अटक केली आहे. पोलिसांनी अतुल पांडेला अटक करून त्याच्या इतर साथीदाऱ्यांची देखील चौकशी सुरु आहे.

मिळालेल्या माहितीनुसार, पोलिसांनी भारतीय न्याय संहितेच्या कलम १०३(१)३/(5) अंतर्गत गुन्हा नोंदवला आहे. प्रत्यक्षदर्शी लोकांनी सांगितलं की, 'आरोपी हे माताराणीच्या दर्शनासाठी कालाकाजी मंदिरात आले होते. दर्शनानंतर त्यांनी सेवादाराकडे प्रसाद मांगितला. त्याचदरम्यान प्रसादावरून वाद वाढला. त्यानंतर हाणामारी झाली. आरोपींनी सेवादाराला बेदम मारहाण केली. या मारहाणीत सेवादाराचा मृत्यू झाल्याची घटना घडली.

मंदिरातील वादावरून आम आदमी पक्षाचे राष्ट्रीय संयोजक आणि दिल्लीचे माजी मुख्यमंत्री अरविंद केजरीवाल यांनी चिंता व्यक्त केली. त्यांनी सोशल मीडियावर व्हिडिओ शेअर करत कायदा सुव्यवस्थेवर प्रश्न उपस्थित केला आहे.