राजधानी दिल्लीतून एक खळबळजनक घटना समोर आली आहे. शनिवारी पूर्व दिल्लीतील शशी गार्डन परिसरात दोन मुलांचे मृतदेह सापडले आहेत. मृत मुलांसोबत एक महिलाही रक्ताच्या थारोळ्यात पडली होती, ही महिला मुलांची आई असल्याचं सांगण्यात येत आहे. पोलिसांनी गंभीर जखमी अवस्थेत महिलेला रुग्णालयात दाखल केलं आहे.

पोलिसांनी दिलेल्या माहितीनुसार, शनिवारी दुपारी २ वाजता शशी गार्डन परिसरात ४२ वर्षीय श्यामजी बेपत्ता झाल्याची माहिती पीसीआरला मिळाली होती. शुक्रवारपासून घराला कुलूप असल्याचे फोनवरून ही माहिती देण्यात आली होती.पोलिसांनी ताफा तात्काळ घटनास्थळी दाखल झाला, मात्र त्यांचं घराला बाहेरून कुलूप लावण्यात आलं होतं.

दरवाजा उघडल्यानंतर खोलीत दोन अल्पवयीन मुले मृतावस्थेत पडल्याचं दिसून आलं. यात १५ आणि ९ वर्षांच्या मुलाचा समावेश आहे. तर त्यांची आई जवळच रक्ताने माखलेल्या अवस्थेत आणि बेशुद्ध पडली होती. पोलिसांनी तात्काळ दोन्ही मुलांचे मृतदेह ताब्यात घेऊन महिलेला रुग्णालयात दाखलं केलं.

बेपत्ता श्यामजीचा अद्याप शोध लागला नसल्याचं पोलिसांनी सांगितलं. पोलीस त्यांचा शोध घेण्यात व्यस्त आहेत. गुन्हे शाखेची टीम आणि एफएसएल टीमला घटनास्थळी पाचारण करण्यात आलं आहे. या संपूर्ण प्रकरणावर कायदेशीर कारवाई सुरू आहे. या घटनेनंतर दिल्लीत खळबळ उडाली.