दोन भावांच्या हत्येनंतर दिल्लीत खळबळ उडाली आहे. ईशान्य दिल्लीतील जाफराबादमध्ये दोन भावांवर गोळ्या झाडून हत्या करण्यात आली आहे. पोलिसांनी पहाटे १:४० वाजता गोळीबार झाल्याची माहिती दिली. या गोळीबारात दोन्ही भावांचा दुर्देवी मृत्यू झाला आहे. सध्या या हत्येमागील कारण वैयक्तिक वैमनस्य असल्याची माहिती आहे. मृताच्या मोठ्या भावाचा आरोप आहे की, त्याच्या आत्याच्या मुलांनी दोन्ही भावांची हत्या केली. सध्या पोलिसांकडून सीसीटीव्ही फुटेजद्वारे तपास सुरू आहे.

फजील (वय वर्ष ३१) आणि नदीम (वय वर्ष ३३) अशी मृत भावांची नावे आहेत. मिळालेल्या माहितीनुसार, ही घटना मंगळवारी रात्री जाफराबादच्या चौहान बांगर परिसरात घडली आहे. प्रत्यक्षदर्शींच्या मते, दोघांवरही १०-१२ गोळ्या घालण्यात आल्या. मृताचा भाऊ वसीमचा दावा आहे की, त्यांचे आत्याच्या मुलांशी भांडण झाले होते. त्यापैकी एकाने दोघा भावांवर गोळी झाडली, असा दावा त्याने केला.

दरम्यान, आरोपींना अटक केल्यानंतर सत्य उघड होईल. दरम्यान, या घटनेनंतर स्थानिकांनी तातडीने पोलिसांना याची माहिती दिली. पोलिसांनी तत्काळ घटनास्थळी जाऊन घटनेची चौकशी केली. एकाचा जागीच तर, दुसऱ्याचा रूग्णालयात नेत असताना मृत्यू झाला.

पोलिसांनी दिलेल्या अधिकृत निवेदनानुसार, या प्रकरणी जाफराबाद पोलीस ठाण्यात गुन्हा दाखल करण्यात आला आहे. तसेच या प्रकरणाचा अधिक तपास सुरू आहे. पोलिसांनी दोन्ही मृतदेह ताब्यात घेऊन शवविच्छेदनासाठी रूग्णालयात पाठवले आहे. आरोपींना अटक करण्यासाठी अनेक पथके तयार केली आहेत. सीसीटीव्ही फुटेजच्या आधारे आरोपींचा शोध सुरू आहे, असं पोलिसांनी सांगितलं.