अति प्रमाणात शक्तीवर्धक गोळ्या खाल्ल्यामुळे एका व्यक्तीचा मृत्यू झाल्याची माहिती समोर आली आहे. ही धक्कादायक घटना दिल्लीतील नबी करीम येथील आरक्षा रोडवरील एका हॉटेलमध्ये घडली आहे.

तो व्यक्ती आपल्या २६ वर्षीय गर्लफ्रेंडसोबत हॉटेलमध्ये गेला. यावेळी त्यांनी शक्तीवर्धक गोळ्या खाल्ल्या. या दरम्यान त्याचा मृत्यू झाल्याची शक्यता वर्तवण्यात आली आहे. या प्रकरणी पोलिसांकडून तपास सुरू असून, या घटनेमुळे परिसरात खळबळ उडाली आहे.

पोलिसांनी दिलेल्या माहितीनुसार, सचिन सागर असे मृत व्यक्तीचे नाव आहे. हा व्यक्ती रोशनरा रोड, सब्जी मंडी परिसरात कुटुंबासोबत राहत होता आणि त्याचा स्वतःचा व्यवसाय होता. बुधवारी दुपारी १२:१५ वाजता तो गर्लफ्रेंडसोबत नबी करीम येथील हॉटेलमध्ये गेला. नंतर त्याने रात्री ९ वाजेपर्यंत रूम बुक केली होती.

सायंकाळी ५ च्या दरम्यान त्याची मैत्रीण हॉटेलमधून बाहेर गेली आणि कर्मचाऱ्यांना "काही वस्तू आणायला जात आहे" असे सांगून निघाली. मात्र ती परतलीच नाही. रात्री ९.३० वाजता हॉटेल कर्मचारी खोलीत गेले. तेव्हा त्यांना सचिन बेडवर ब्लँकेटने झाकलेला मृतावस्थेत आढळला. कर्मचाऱ्यांनी तात्काळ हॉटेल व्यवस्थापक मुंतजार आलम यांना माहिती दिली, आणि त्यांनी पोलिसांना कळवले.

पोलिसांनी घटनास्थळी दाखल होत औषधांचे काही पुरावे जप्त केले आहेत. शवविच्छेदन अहवालातून मृत्यूचं नेमकं कारण स्पष्ट होणार आहे.सध्या पोलिसांकडून सचिनसोबत असणाऱ्या महिलेचा शोध सुरू आहे. या संपूर्ण प्रकरणामुळे नबी करीम परिसरात खळबळ उडाली आहे. त्याचा मृत्यू नेमका कसा झाला? यामागचं कारण शक्तीवर्धक गोळ्या की आणखी काही? याचा तपास पोलिसांकडून सुरू आहे.