प्रमोद जगताप, प्रतिनिधी...

Delhi Crime News: देशाची राजधानी दिल्लीमधून एक धक्कादायक बातमी समोर आली आहे. दिल्ली सरकारमधील महिला व बालकल्याण विभागातील एका वरिष्ठ अधिकाऱ्याने अल्पवयीन मुलीवर बलात्कार केल्याची घटना समोर आली आहे. विशेष म्हणजे अधिकाऱ्याने मित्राच्या १४ वर्षीय मुलीवर अनेक महिने अत्याचार केला. घटनेनंतर राष्ट्रीय महिला आयोगाच्या अध्यक्ष स्वाती मालिवाल यांचे ट्विट करत त्या अधिकाऱ्याला अटक करण्याचे आदेश दिले आहेत.

याबाबत सविस्तर माहिती अशी की, मित्राच्या मृत्यूनंतर त्याच्या अल्पवयीन मुलीवर अत्याचार केल्याचा प्रकार उघडकीस आला. या प्रकरणी दिल्ली (Delhi) सरकारमधील महिला व बालकल्याण विभागातील बड्या सरकारी अधिकाऱ्यावर गुन्हा दाखल करण्यात आला आहे. पीडित मुलगी अल्पवयीन असून आरोपीने २०२० ते २०२१ या कालावधीत अनेकदा बलात्कार केला आहे.

धक्कादायक बाब म्हणजे पीडित मुलगी गर्भवती राहिल्यानंतर आरोपीने आपल्या पत्नीच्या मदतीने तिचा गर्भपात केला. या घटनेनंतर राष्ट्रीय महिला आयोगाच्या अध्यक्ष स्वाती मालिवाल यांनी आक्रमक भूमिका घेत संबंधित अधिकाऱ्याला अटक करण्याचे आदेश दिले आहेत.

२०२० मध्ये या मुलीच्या वडिलांचे निधन झाले होते. त्यानंतर आधार देण्याच्या बहाण्याने संबंधित अधिकाऱ्याने तिच्याशी जवळीक साधत के कृत्य केले. दरम्यान, या घटनेनंतर दिल्लीचे मुख्यमंत्री अरविंद केजरीवाल यांनी या अधिकाऱ्याला निलंबित करण्याचे आदेश दिले आहेत. सोबतच, या प्रकरणी मुख्य सचिवांकडून सायंकाळी 5 वाजेपर्यंत रिपोर्ट मागवला आहे. (Latest Marathi News)