Abhijeet Dipke statement before Tiranga March in Delhi : दिल्लीतल्या कनॉट प्लेस इथल्या सेंट्रल पार्कमध्ये आज CJP कडून तिरंगा मोर्चा काढण्यात येणार आहे. तिरंगा मोर्चाच्या पार्श्वभूमीवर सीजेपीचे संस्थापक अभिजीत दिपके यांनी मध्यरात्री अचानक पत्रकार परिषद घेतली. या पत्रकार परिषदेत दिपकेंनी मोदी सरकारवर गंभीर आरोप केले. ते म्हणाले की, पोलीस मला ताब्यात घेऊ शकतात. पण जर तिरंगा फडकवल्यामुळे तुरुंगात जावे लागत असेल, तर आम्ही त्यासाठी तयार आहोत. (CJP Tiranga March at Connaught Place Central Park)

दरम्यान नवी दिल्ली नगरपालिकेने दिल्लीतील कनॉट प्लेस इतलं 'सेंट्रल पार्क' सर्वसामान्य नागरिकांसाठी बंद ठेवण्याची घोषणा केलीय. प्रशासकीय कारणास्तव आज आणि उद्या सेंट्रल पार्क पूर्णपणे बंद राहणार असल्याचे स्पष्ट करण्यात आलं आहे. या कालावधीत सुरक्षा व्यवस्थेच्या नियमांचं पालन करावं असं आवाहन प्रशासनाकडून करण्यात आलं आहे. याच सेंट्रल पार्कमध्ये आज CJP कडून तिरंगा मोर्चा काढण्यात येणार आहे.

सीजेपीचे संस्थापक अभिजीत दिपके यांनी म्हटले आहे की, या महत्त्वाच्या तिरंगा मोर्चाच्या पार्श्वभूमीवर दिल्ली पोलीस त्यांना ताब्यात घेऊ शकतात. जर तिरंगा फडकवण्यासाठी तुरुंगात जाण्याची वेळ आली, तरी आपण त्यासाठी पूर्णपणे तयार असल्याचे त्यांनी स्पष्ट केले आहे. सीजीपीच्या दास आणि रांका यांनी पोलिसांनी ताब्यात घेतले आहे, त्या निषेधार्थ तिरंगा मोर्चा काढण्यात येणार आहे. आता सरकारकडून सेंट्रल पार्क दोन दिवसांसाठी बंद केले. त्यामुळे पुन्हा एकदा दिल्लीतील वातावरण तापण्याची शक्यता आहे.

"आम्ही मोदीजींना सांगू इच्छितो की या गोष्टींना आम्ही अजिबात घाबरत नाही," असे म्हणत दिपके यांनी, "जर या देशात तिरंगा फडकवण्यासाठी आम्हाला जेलमध्ये जावे लागले, तरी आम्ही तयार आहोत," असा निर्धार व्यक्त केला आहे. सेंट्रल पार्क बंद करण्यावरून त्यांनी प्रशासनावर टीका केली असून, अशा कारवायांमुळे मागे हटणार नसल्याचे त्यांनी दर्शवले आहे