एका 57 वर्षीय महिलेनं आपल्या घरमालकाला रॉकेल टाकून जिंवत जाळल्याची घटना ओडिसातील गंजम येथे घडलीय. याप्रकरणी पोलिसांनी आरोपी महिलेला अटक केलीय. मिळालेल्या माहितीनुसार, ही महिला 72 वर्षाच्या घर मालकासोबत 5 वर्षापासून लिव्ह -इन मध्ये राहत होती.

लिव्ह -इन-मध्ये राहणाऱ्या महिलेने आपल्या जोडीदाराला का मारलं याचे कारण पोलीस तपासात उघड झाले आहे. जोडीदाराला मारण्याचं कारण ऐकून अनेकांच्या भुवया उंचावल्या आहेत. पोलिसांनी दिलेल्या माहितीनुसार, सुदेशना जेना असं आरोपी महिलेचं नाव आहे. तर मृत घर मालकाचे नाव हरिहर साहू असं आहे. हरिहर साहू याची संपत्ती हडपण्यासाठी महिलेनं 72 वर्षीय जोडीदाराची हत्या केलीय.

तपास पथकाचे भाग असलेले पोलीस अधिकारी , सरवण विवेक एम यांनी याप्रकरणी अधिक माहिती दिलीय. त्यांनी दिलेल्या माहितीनुसार, आरोपी महिला सुदेशना ही विधवा आहे, आणि गेल्या पाच वर्षांपासून निवृत्त महसूल अधिकारी साहू यांच्यासोबत लिव्ह-इन रिलेशनशीपमध्ये राहत होती. हत्येच्या दिवशी साहू आपल्या बेडरुममध्ये झोपलेला होता. त्यावेळी जेना हिने त्याच्या अंगावर रॉकेल टाकलं त्यानंतर त्याला पेटून दिलं.

आगीत हरिहर साहू गंभीरित्या भाजले होते. त्यांना बऱ्हामपूरच्या एका हॉस्पिटलमध्ये नेण्यात आलं. परंतु त्यांना डॉक्टरांनी मृत घोषित केलं. पोलिस अधिकाऱ्यानं सांगितलं की, महिलेनं आपल्या पतीला प्लानिग करून मारलं. तसेच पुरावे नष्ट करण्याचा प्रयत्न केला. घर मालकाचा फोन तिने घराच्या अंगणात फेकून दिला होता. ज्या बॉटलमधून रॉकेल फेकलं ती बॉटलदेखील तिने आगीत फेकून ती जाळून टाकली.