हरियाणा विधानसभा निवडणुकीसाठी काँग्रेसने आपल्या उमेदवारांची दुसरी यादी जाहीर केली आहे. दुसऱ्या यादीत काँग्रेसने 9 उमेदवारांची नावे जाहीर केली आहेत. भाजपला रामराम ठोकत काँग्रेसमध्ये सामील झालेल्या ब्रिजेंद्र सिंह यांना उचाना येथून तिकीट देण्यात आलं आहे.

तोशाममधून अनिरुद्ध चौधरी, मेहममधून बलराम डांगी, बादशाहपूरमधून वर्धन यादव, गुरुग्राममधून मोहित ग्रोवर, नांगल चौधरीमधून मंजू चौधरी, तोहानामधून परमवी सिंग, ठाणेसरमधून अशोक अरोरा यांना तिकीट देण्यात आलं आहे. काँग्रेसने आतापर्यंत दोन यादीत एकूण 41 उमेदवार जाहीर केले आहेत.

ब्रिजेंद्र सिंह हिसारमधून भाजपचे खासदार होते. मात्र लोकसभा निवडणुकीआधी त्यांनी काँग्रेसमध्ये प्रवेश केला होता. आता त्यांना विधानसभा निवडणुकीत तिकीट देण्यात आलं आहे. उचाना कलानमध्ये ब्रिजेंद्र सिंह यांचा सामना दुष्यंत चौटाला यांच्याशी होणार आहे. याशिवाय माजी विधानसभा अध्यक्ष कुलदीप शर्मा यांना गन्नौर विधानसभेचे तिकीट मिळालं आहे.

काँग्रेसशिवाय भाजपनेही हरियाणामध्ये आपल्या 67 उमेदवारांची नावे जाहीर केली आहेत. या यादीत मुख्यमंत्री नायबसिंग सैनी, अनिल विज आदींची नावे होती. भाजपने उमेदवारांच्या नावाची यादी जाहीर केल्यानंतर अनेक नाराज नेत्यांनी राजीनामे दिले.

दरम्यान, हरियाणा आणि जम्मू-काश्मीरमध्ये विधानसभा निवडणुका होणार आहेत. हरियाणातील सर्व 90 जागांवर एकाच टप्प्यात 5 ऑक्टोबर रोजी मतदान होणार आहे. याआधी मतदानाची तारीख 1 ऑक्टोबर होती, मात्र नंतर निवडणूक आयोगाने ती बदलून 5 ऑक्टोबर केली. हरियाणा आणि जम्मू-काश्मीरचे निकाल 8 ऑक्टोबरला जाहीर होतील.