प्रमोद जगताप

Vijay Vadettiwar News: केंद्र शासनाने निर्यात शुल्कात वाढ केल्यामुळे शेतकऱ्यांनी आक्रमक भूमिका घेतली आहे. केंद्र सरकारच्या निर्णयाविरुद्ध शेतकरी आणि व्यापाऱ्यांनी बेमुदत संप पुकारला आहे. याचदरम्यान, मंत्री दादा भुसे यांनी 'कांदा परवडत नसेल, तर खाऊ नका, असं वक्तव्य केलं. त्यानंतर विरोधकांनी आक्रमक भूमिका घेतली आहे.

'तेल-साखर महाग झालं तर खाणे बंद करावं आणि उपाशी मरावं, अशा शब्दात विरोधी पक्षनेते विजय वड्डेटीवार यांनी मंत्री दादा भुसे यांच्या वक्तव्याचा समाचार घेतला आहे. (Latest Marathi News)

विरोधी पक्षनेते विजय वड्डेटीवार हे सध्या दिल्ली दौऱ्यावर आहेत. दिल्लीत वड्डेटीवार यांनी प्रसारमाध्यमांशी संवाद साधला. त्यावेळी वड्डेटीवार यांनी मंत्री दादा भुसे यांच्या वक्तव्याचा समाचार घेतला.

वड्डेटीवार म्हणाले,'उद्या हे कांदा महाग झाला खाऊ नका म्हणतील तेल महाग झालं तर तेल घेऊ नका. साखर महाग झाली तर साखर खाऊ नका म्हणजे ज्यांच्याकडे पैसे आहेत त्यांनी पोटभर खावं आणि जो गरीब आहे, मध्यम वर्गीय आहे यांनी मात्र महाग झालं खाणे बंद करावं आणि उपाशी मरावं. अशी जर सरकारची भूमिका असेल तर जनतेने यांना धडा शिकवण्याची गरज आहे'. या संदर्भात कॉंग्रेस रस्त्यावर उतरून आंदोलन करेल, अशा इशाराही त्यांनी दिला.

दरम्यान, केंद्र शासनाने निर्यात शुल्कात वाढ केल्याने यावरून विरोधी पक्षनेते विजय वड्डेटीवार यांनी मुख्यमंत्र्यांना पत्र लिहिलं आहे. तसेच कांदा निर्यात शुल्कावर भाष्य करताना वड्डेटीवर म्हणाले, 'गेल्या वर्षी जाहीर केलेले 350 रूपये कांदा अनुदान अजून शेतकऱ्यांना मिळाले नाही.लहरी पद्धतीने सरकारने ४० टक्के निर्यात शुल्क लावल्यामुळे कांद्याचे दर १० ते १२ रुपयांवर आले आहे'.

'बांग्लादेशाच्या सीमेवर शुल्क वाढल्यामुळं हजारो टन कांदा पडला आहे. बाजार समित्या ओसाड आणि बंद पडल्या आहेत. कांदा उत्पादकांसंदर्भात सरकार गंभीर नाही, अशी टीका वड्डेटीवार यांनी केली आहे.