दिल्ली|ता. ६ मे २०२४

काँग्रेसच्या राष्ट्रीय प्रवक्त्या राधिका खेडा यांनी पक्षाच्या प्राथमिक सदस्यत्वाचा राजीनामा दिला आहे. लोकसभा निवडणुकीच्या तिसऱ्या टप्प्याच्या अवघ्या दोन दिवस आधी त्यांनी हा निर्णय घेतला असून पक्षासाठी हा मोठा धक्का मानला जात आहे. राधिका खेडा यांनी काँग्रेस अध्यक्ष मल्लिकार्जुन खरगे यांना लिहलेल्या पत्रामध्ये गंभीर आरोप करताना राममंदिराला भेट दिल्यामुळे विरोधाचा सामना करावा लागल्याचे म्हटले आहे.

काँग्रेसच्या राष्ट्रीय प्रवक्त्या राधिका खेडा यांनी पक्षसदस्यत्वाचा तडकाफडकी राजीनामा दिला. याबाबत एक्स माध्यमावर पोस्ट करत याबाबतची माहिती त्यांनी दिली आहे. ज्यामध्ये त्यांनी "आज मी अत्यंत दुःखाने पक्षाचे सदस्यत्व सोडत आहे आणि माझ्या पदाचा राजीनामा देत आहे. मी एक मुलगी आहे आणि मी लढू शकते, आणि मी आता तेच करत आहे. मी माझ्या आणि माझ्या देशवासीयांच्या न्यायासाठी लढत राहीन, असे म्हटले आहे. तसेच याबाबत पक्षाचे अध्यक्ष मल्लिकार्जुन खरगे यांना लिहलेल्या पत्रामध्ये त्यांनी गंभीर आरोप केले आहेत.

"प्राचीन काळापासून धर्माची साथ करणाऱ्यांना विरोध करण्यात येतो. हिरण्यकशिपूपासून ते रावण आणि कंसापर्यंत अनेक उदाहरणे आहेत. प्रभू श्रीरामाचे नाव घेणाऱ्यांना काही लोक विरोध करत आहेत. मात्र प्रत्येक हिंदुसाठी श्री राम जन्मभूमी पवित्र स्थान आहे. मी ज्या पक्षामध्ये २२ वर्ष काम केले, त्याच पक्षात विरोधाला सामोरे जावे लागत आहे. कारण मी राम मंदिरात जाण्यापासून स्वतःला रोखू शकले नाही, असे त्यांनी म्हटले आहे.

छत्तीसगड प्रदेश काँग्रेस कार्यालयात माझ्यासोबत घडलेल्या घटनेत मला न्याय देण्यास नकार दिला. मी नेहमीच इतरांच्या न्यायासाठी प्रत्येक व्यासपीठावरुन लढले आहे. पण जेव्हा स्वतःच्या न्यायाचा प्रश्न आला तेव्हा मला पक्षात पराभव पत्करावा लागला. एक स्त्री म्हणून मी खूप दुखावले आहे. पक्षाच्या सर्व प्रमुख नेत्यांना वारंवार कळवूनही न्याय न मिळाल्याने वेदनेतून मी हे पाऊल उचलले आहे, असे त्यांनी म्हटले आहे.