दिल्लीतील मालवीय नगरमध्ये भीषण हत्येची घटना घडली. मॉर्निंग वॉकसाठी गेलेल्या एका व्यावसायिकाची हल्लेखोरांनी गोळ्या झाडून हत्या केली. व्यावसायिक हे काँग्रेस पक्षाशी संबंधित होते. पोलिसांना या प्रकरणाची माहिती मिळताच त्यांनी तपासाला सुरूवात केली. मारेकऱ्यांची ओळख पटली असून, पुढील तपास पोलिसांकडून सुरू आहे.

लखपत सिंह कटारिया (वय वर्ष ५५) असे मृत व्यावसायिकाचे नाव आहे. डीसीपी अंकित चौहान यांनी दिलेल्या माहितीनुसार, मालवीय नगरमधील बेगमपूर येथील रहिवासी लखपत सिंह कटारिया हे उद्यानात मॉर्निंग वॉकसाठी गेले होते. हल्लेखोरांनी त्यांना आधी क्रिकेट बॅटने मारहाण केली. नंतर चार गोळ्या झाडून फरार झाले. स्थानिकांनी तातडीने पोलिसांना याची माहिती दिली.

पोलिसांनी घटनास्थळी पोहोचून कटारिया यांना जवळच्या रूग्णालयात दाखल केले. मात्र, उपचारादरम्यान, त्यांचा मृत्यू झाला. मालमत्तेच्या वादातून ही घटना घडल्याची माहिती आहे. त्यांच्या पश्चात पत्नी आणि दोन मुले आहेत. मिळालेल्या माहितीनुसार, आरोपींनी कटारिया यांची हत्या करण्यापूर्वी आरोपींनी दुचाकीवरून रेकी केली होती. आरोपींना कटारिया पार्कमध्ये येण्याती वेळ माहिती होती.

पार्कचे सुरक्षा रक्षक देवेंद्र यांनी सांगितले की, २ अज्ञात व्यक्ती पार्कमध्ये आले. कटारिया यांना मारहाण करू लागले. आरोपींनी कटारिया यांना बॅटने मारहाण करू लागले. मारहाणीनंतर एकानं पिस्तूल बाहेर काढली. तसेच कटारिया यांच्यावर गोळीबार केला. याप्रकरणी पोलीस पार्कबाहेरील सीसीटीव्ही फुटेज तपासात आहे. सध्या पोलिसांकडून अधिक तपास सुरू आहे.