Body Builder Death :

बदललेल्या जीवनशैलीमुळे तरुणाईमध्ये हृदयविकार म्हणजेच हार्टअटॅकचं प्रमाण मोठ्या प्रमाणात वाढत आहे. हृदयविकाराच्या झटक्याने मृत्यू झाल्याच्या अनेक घटना तुम्ही ऐकल्या असतील. तर काही घटनांचे व्हिडीओ देखील समोर आले आहेत.

हृदयविकाराच्या झटक्याचा धोका टाळण्यासाठी नियमित व्यायाम करण्याच्या सल्लाही अनेक तज्ज्ञ देतात. मात्र एका बॉडी बिल्डरचा जीममध्येच मृत्यू झाल्याची घटना समोर आली आहे. चेन्नईच्या कोराट्टूर येथे ही घटना घडली आहे. (Latest Marathi News)

मिळालेल्या माहितीनुसार, 41 वर्षीय बॉडी बिल्डर योगेशचा रविवारी जीममध्ये हृदयविकाराच्या झटक्याने मृत्यू झाला आहे. योगेश 2022 पासून जीमपासून दूर होता. मात्र पुढच्या महिन्यात होणाऱ्या स्पर्धेसाठी त्याने पुन्हा तयारी सुरू केली होती. ज्यासाठी तो सतत जीममध्ये जाऊन घाम गाळत होता. याआधी योगेशने 'मिस्टर तामिळनाडू'चा किताब पटकावला होता.

दरम्यान तो कोरट्टूर जिममध्ये जिम ट्रेनर म्हणून लोकांना प्रशिक्षण देत होता. मृत्यूच्या काही तास आधीही तो प्रशिक्षण देत होता. त्यानंतर जीम केल्यानंतर योगेशने व्यायामशाळेत स्टीम बाथ घेण्यासाठी गेला.

मात्र बराच वेळ झाला तरी आतून काही आवाज येत नव्हता. त्यानंतर जीममधील तरुणांनी बाथरूमचा दरवाजा तोडला. त्यावेळी योगेश बाथरूममध्ये जमिनीवर बेशुद्ध अवस्थेत पडलेला होता. हे पाहून सर्वांनाच धक्का बसला.

क्षणाचाही विलंब न करता तरुणांनी योगेशला रुग्णालयात नेले, पण तोपर्यंत खूप उशीर झाला होता. डॉक्टरांनी योगेशला मृत घोषित केले. योगेशचा मृत्यू हृदयविकाराच्या झटक्याने झाल्याचे डॉक्टरांनी सांगितले.