हरियाणा आणि चंढीगडमधील सरकारी विभागात ६६१ कोटी रुपयांचा निधी घोटाळा झाल्याचं उघडकीस आले आहे. याप्रकरणाचा तपास करताना सीबीआयने सहा ठिकाणी छापेमारी केली आहे. यात चंढीगड, पंचकूला आणि दिल्ली-एनसीआरमधील सहा ठिकाणी छापेमारी करण्यात आली आहे. ही छापेमारी आयडीएफसी फर्स्ट बँक आणि एयू फायनान्स बँकेमार्फत सरकारी निधीत झालेल्या कथित अपहार प्रकरणी करण्यात आली आहे.

या तपासात हरियाणा सरकारच्या आठ विभागांच्या आणि चंढीगड प्रशासनाच्या दोन विभागांच्या निधीमध्ये अनियमितता उघड झाली आहे. चंढीगड महानगरपालिका आणि क्रेस्ट चंढीगड यांच्या खात्यांमध्येही अनियमितता आढळून आली आहे. सीबीआयनं हरियाणा कॅडरचे वरिष्ठ अधिकारी सरकारी अधिकाऱ्यांच्या निवासस्थानांची तसेच वरिष्ठ अधिकाऱ्यांच्या परिसराची आणि कंपनीचीही झडती घेतली. Vipam Consultancy Pvt. Ltd. आणि निदेशकांच्या परिसरातही तपासात करण्यात आला.

बड्या अधिकाऱ्यांवर कारवाई

सीबीआयच्या वरिष्ठ सरकारी अधिकाऱ्यांच्याविरुद्धातही मोठी कारवाई करण्यात आली आहे. सीबीआयने ३ आयएएस आणि १ आयएफएस अधिकाऱ्यासह अनेक सरकारी अधिकाऱ्यांच्या निवासस्थानांवर छापेमारी करण्यात आली आहे. हरियाणा सरकारने राज्यातील वरिष्ठ आयएएस अधिकाऱ्यांची चौकशी करण्यासाठी सीबीआयला नुकतीच खटला चालवण्याची परवानगी दिल्यानंतर ही कारवाई करण्यात आली आहे.

यानंतर सीबीआयचे पथक आयएएस अधिकारी मोहम्मद शायिन, पंकज अग्रवाल, प्रदीप कुमार आणि आयएफएस अधिकारी नवनीत कुमार यांच्या ठिकाणांवर पोहोचले. या अधिकाऱ्यांवर बँक अधिकाऱ्यांशी संगनमत करून सरकारी निधीचा गैरवापर आणि अपहार केल्याचा आरोप आहे.