भारतीय वंशाचे प्रसिद्ध उद्योजक दर्शन सिंह साहसी यांची कॅनडामध्ये गोळी झाडून हत्या करण्यात आली. घराबाहेर पडत असताना त्यांच्यावर गोळी झाडण्यात आली. मिळालेल्या माहितीनुसार, दर्शन टेक्सटाईल रिसायकलिंग व्यवासायाशी निगडीत होते. त्यांच्या फॅक्टरीमध्ये शेकडो कर्मचारी काम करीत होते. मात्र, गोळ्या झाडून त्यांची निर्घृण हत्या करण्यात आली. दरम्यान, लॉरेन्स बिश्नोई टोळीशी संबंधित गुन्हेगार गोल्डी ढिल्लन याने सोशल मीडियावर पोस्ट शेअर करून या हत्येची जबाबदारी स्वीकारली.

प्राथमिक माहितीनुसार, दर्शन सिंह यांना गेल्या काही दिवसांपासून खंडणीच्या धमक्या येत होत्या. परंतु त्यांनी ही बाब गांभीर्यानं घेतली नव्हती. मात्र, घटनेच्या दिवशी दर्शन सिंह कॅनडातील घरातून बाहेर पडताच त्यांच्यावर गोळ्या झाडून हत्या करण्यात आली.

कॅनेडियन पोलिसांनी सध्या या हत्येत कोणताही गुंड किंवा खंडणीखोरांच्या टोळीचा सहभाग नसल्याचं सांगितलं. पोलिसांचे म्हणणे आहे की, कुटुंबाने या संदर्भात कोणताही संशय व्यक्त केलेला नाही. जुन्या वैमनस्यातून किंवा वैयक्तिक वादातून ही हत्या करण्यात आली असावी, असा अंदाज व्यक्त केला आहे.

दर्शन सिंह हे मूळचे पंजाबच्या लुधियाना जिल्ह्यातील दोराहा भागातील रहिवासी. ते कॅनडामधील रहिवासी होते. भारतीय अमेरिकन समुदायात त्यांचा खूप आदर केला जात होता. दर्शन सिंह हे सामाजिक सेवा आणि धर्म कार्यात सक्रियपणे सहभागी होते.

दरम्यान, लॉरेन्स बिश्नोई टोळीशी संबंधित गुन्हेगार गोल्डी ढिल्लन याने सोशल मीडिया पोस्टमध्ये बिझनेसमॅन दर्शन सिंह यांच्या हत्येची जबाबदारी स्वीकारली. पोस्टमध्ये टोळीनं दावा केला की, दर्शन सिंह यांच्याकडे त्यांनी दर्शन सिंह यांच्याकडे पैसे मागितले होते. परंतु, त्यांनी पैसे देण्यास नकार दिला. दर्शन सिंह यांनी बिश्नोई टोळीचा नंबर ब्लॉक केला होता. त्यानंतर टोळीनं त्यांच्यावर गोळ्या झाडल्या.