IndiGo Flight Bomb Threat:

चेन्नईहून मुंबईकडे निघालेल्या इंडिगो फ्लाइट 6E-5188 या विमानात धमकीचे पत्र विमान हवेत असताना मिळाल्यानंतर एकच खळबळ उडाली. या पत्रानंतर हे विमान तात्काळ थांबवण्यात आले, सर्वत्र शोधाशोध करण्यात आली. मात्र तसा कोणताही प्रकार न आढळल्याने सर्वांनी सुटकेचा निश्वास सोडला.

याबाबत सविस्तर माहिती अशी की, चेन्नई येथून मंगळवारी सकाळी इंडिगो कंपनीच्या ६ई-५१८८ या विमानाने मुंबईसाठी उड्डाण केले होते. विमान मुंबईपासून ४० किलोमीटर अंतरावर असताना विमानाच्या शौचालयात कर्मचाऱ्यांना एक चिठ्ठी आढळून आली. या चिठ्ठीमध्ये "मुंबईला याल तर सगळे मरतील," अशा आशयाचा मजकूर होता.

एका टिश्यू पेपरवर ही धमकी लिहण्यात आली होती.या धमकीमुळे प्रवासी, कर्मचाऱ्यांची एकच धावपळ उडाली. हा प्रकार केबिन क्रूच्या निदर्शनास येताच त्यांनी तात्काळ पायलटला याबाबत माहिती दिली. तसेच विमानाच्या कॅप्टनने तात्काळ एअर ट्राफिक कंट्रोलला याबाबतची माहिती दिली.

दरम्यान, विमान मुंबईत उतरताच संपूर्ण विमानाची आणि प्रवाशांची तपासणी करण्यात आली. या तपासणीत विमानात काहीही संशयास्पद न सापडल्याचा खुलासा मुंबई पोलिसांनी केला. ज्यानंतर सर्वांनी सुटकेचा निःश्वास सोडला. या प्रकरणी मुंबई पोलिसांनी अज्ञाताविरोधात गुन्हा नोंद केला आहे. (Latest Marathi News)

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)