केंद्रीय मंत्री आणि भाजप नेते रवनीत सिंह बिट्टू यांनी लोकसभेचे विरोधी पक्षनेते राहू गांधी यांच्याबद्दल वादग्रस्त वक्तव्य केलं आहे. राहुल गांधी दहशतवादी असल्याचं रवनीत सिंह बिट्टू म्हणाले आहेत ते म्हणाले आहेत की, ''राहुल गांधींनी शिखांमध्ये फूट पाडण्याचा प्रयत्न केला आहे. शीख कोणत्याही पक्षाशी संबंधित नसून तेढ निर्माण करण्याचे प्रयत्न सुरू आहेत. राहुल गांधी हे देशातील नंबर एकचे दहशतवादी आहेत.''

ते म्हणाले, जे लोक नेहमी लोकांना मारण्याचा गोष्टी करतात. जहाजे आणि ट्रेन उडवण्याबद्दल धमकी देतात, ते राहुल गांधींच्या समर्थनार्थ उतरले आहेत. माझ्या मते, कोणाला पकडण्यासाठी बक्षीस ठेवायला हवे तर ते राहुल गांधी आहेत. राहुल गांधी हे देशाचे सर्वात मोठे शत्रू असल्याचेही ते म्हणाले.

रवनीत सिंह बिट्टू म्हणाले, ''राहुल गांधी हे भारतीय नाहीत. त्यांनी आपला बहुतांश वेळ बाहेर घालवला आहे. त्यांना आपल्या देशावर फारसे प्रेम नाही, कारण ते परदेशात जाऊन सर्व काही चुकीच्या पद्धतीने सांगतात. जे मोस्ट वाँटेड आहेत, फुटीरतावादी आहेत, बॉम्ब, बंदुका आणि शेल बनवण्यात मास्टर आहेत. त्यांनी राहुल गांधींच्या वक्तव्याचे कौतुक केले आहे.''

बिट्टू म्हणाले की, ''राहुल गांधी पहिल्यांदाच संसदेत विरोधी पक्षनेते बनले आहेत. कधी ते शिखांच्या असुरक्षिततेबद्दल बोलतात तर कधी समाजाच्या विघटनाबद्दल बोलतात. त्याचे वर्तन अक्षम्य आहे.''

ते म्हणाले की, मी काँग्रेस खूप जवळून पाहिली आणि तपासली. मी काँग्रेसच्या तिकिटावर तीनदा खासदार झालो आहे. पंतप्रधान मोदींची लोकप्रियता आणि भाजपच्या मूळ मंत्रांनी प्रभावित होऊन भाजपचे सदस्यत्व घेतल्याचे त्यांनी सांगितले. पंतप्रधान मोदींच्या नेतृत्वाखालील केंद्र सरकारमध्ये सहभागी होऊन मी रेल्वे क्षेत्रात देशवासीयांची सेवा करत आहे.