भाजपचे दिग्गज नेते पुनीत त्यागी यांचा मृतदेह हरिद्वारमध्ये सापडला आहे. हृदयविकाराच्या झटक्याने त्यांचा मृत्यू झाल्याचे सांगितले जात होते. मिळालेल्या माहितीनुसार, पुनीत त्यागी 29 जानेवारी रोजी सकाळी 8 वाजेच्या सुमारास आपल्या कारखान्यात जाण्यासाठी घरातून निघाले, पण ते घरी परतलेच नाही. रात्री उशिरापर्यंत वाट बघून त्यांच्या कुटुंबीयांनी त्यांचा शोध घेण्यास सुरुवात केली. त्यांचा काहीच थांगपत्ता न लागल्याने, त्यांच्या पत्नी ममता त्यागी यांनी 1 फेब्रुवारी रोजी सहारनपुरमधील पोलीस ठाण्यात ते बेपत्ता असल्याची तक्रार दाखल केली.

पोलिसांनी तात्काळ त्यांना शोधण्यासाथी पथके तयार केली आणि मोबाईल कॉलच्या सहाय्याने तांत्रिक तपास सुरू होता. दरम्यान सोमवारी त्यांचा मृतदेह हरिद्वारमध्ये सापडल्याने राजकारणात मोठी खळबळ उडाली.

पुनीत त्यागी यांच्या निधनाची बातमी समजताच भाजप कार्यकर्ते आणि स्थानिक राहिवाश्यांनी त्यांना अखेरचा निरोप देण्यासाठी गर्दी केली होती. पोलिसांच्या मते प्राथमिक दृष्ट्‍या त्यांचा मृत्यू हृदयविकाराच्या झटक्याने झाल्याचं सांगितलं जात असले तरी सर्व बाजूंनी तपास केला जात आहे. शवविच्छेदन अहवाल प्राप्त झाल्यावरच नेमकं कारण कळेल असे पोलिसांनी सांगितले.

सध्या या घटनेमुळे राजकीय वर्तुळात अनेक तर्क वितर्क लावले जात असून अचानक त्यांचं बेपत्ता होणे आणि दुसऱ्या शहरात मृतदेह सापडणे. पोलीस या घटनेचा अधिक तपास करत आहे.