अहमदाबाद: भाजपचे नेते दीपक मोदी यांनी आज पहाटे विसनगर शहरात आत्महत्या केल्याची धक्कादायक घटना घडली आहे. ते विसनगर नगरपालिकेचे प्रभाग क्रमांक 1 चे नगरसेवक होते. त्यांनी पहाटे रेल्वेखाली उडी मारून आत्महत्या केली. या घटनेची बातमी पसरताच भाजपमध्ये मोठी खळबळ उडाली आहे.

मिळालेल्या प्राथमिक माहितीनुसार, विसनगरमधील कंसा NA भागातील गणेश नगर सोसायटीत राहणारे ५४ वर्षीय दीपकभाई मोदी यांनी सकाळी वरेथा-गांधीनगर पॅसेंजर ट्रेनखाली उडी घेऊन आपली जीवनयात्रा संपवली. पतनी दरवाजा ते मोटल हॉटेल रस्त्यावरील स्मशानभूमीजवळ असलेल्या नाल्याजवळ ही दुर्दैवी घटना घडली. हा अपघात इतका भीषण होता की त्यांच्या शरीराचे दोन तुकडे झाले.

दीपकभाई मोदी हे विसनगर पालिकेतील भाजपचे एक सक्रिय नेते होते. नुकत्याच झालेल्या विसनगर नगरपालिकेच्या निवडणुकीत ते प्रभाग क्रमांक १ मधून बिनविरोध निवडून आले होते. त्यांची संघटनात्मक पकड आणि पक्षाप्रती असलेली निष्ठा पाहून त्यांच्यावर पालिकेत भाजप पक्षनेतेपदाची महत्त्वाची जबाबदारी सोपवण्यात आली होती. दीपकभाई हे दानशूर व्यक्तीमत्त्वाचे होते आणि राष्ट्रीय स्वयंसेवक संघाचे (RSS) सदस्यही होते.

कुटुंब आणि भाजप परिवारावर शोककळा

दीपकभाई मोदी यांच्या पश्चात पत्नी, एक मुलगी आणि दोन मुले असा परिवार आहे. त्यांच्या पत्नीही यापूर्वी कंसा पंचायत समितीमध्ये सदस्य राहिल्या आहेत. कुटुंबातील कर्त्या पुरुषाच्या अशा अचानक आणि अकाली जाण्याने मोदी कुटुंबावर दुःखाचा डोंगर कोसळला आहे. घटनेची माहिती मिळताच स्थानिक नागरिक आणि नातेवाइकांनी घटनास्थळी मोठी गर्दी केली होती. पोलिसांनी तातडीने घटनास्थळ गाठून पंचनामा केला आणि मृतदेह शवविच्छेदनासाठी विसनगर सिव्हिल हॉस्पिटलमध्ये पाठवला.

भाजपच्या एका सक्रिय नेत्याच्या मृत्यूची बातमी समजताच विसनगर शहर भाजप अध्यक्ष, जिल्हा भाजप अध्यक्ष, नगरसेवक आणि मोठ्या संख्येने पक्षाचे पदाधिकारी व कार्यकर्ते रुग्णालयात पोहचले. दीपकभाई यांनी आत्महत्येसारखे टोकाचे पाऊल का उचलले, याचे कारण अद्याप समजू शकलेले नाही. पोलीस या प्रकरणाचा पुढील तपास करत आहेत.