प्रियकराला लग्नाला नकार दिला म्हणून प्रेयसीची हत्या अशा धक्कदायक घटना वारंवार आपण ऐकत आलो आहोत. मात्र मामाच्या मुलीने आत्येच्या मुलाशी लग्न करण्यास नकार दिल्याने तिची हत्या करण्यात आली आहे. या घटनेने परिसरात मोठी खळबळ उडाली असून भीतीचे वातावरण निर्माण झाले आहे. पोलीस या प्रकरणी पुढील तपास करत आहेत.

मिळालेल्या माहितीनुसार, बिहारमधील शेखपुरा जिल्ह्यातील शेखपुरासराय बाजारपेठेतील एका गावात बुधवारी दिवसाढवळ्या एका तरुणीची निर्घृण हत्या करण्यात आली. माहिती मिळताच शेखपुरासराय पोलीस ठाण्यातील पोलिसांनी घटनास्थळी धाव घेतली. मात्र पोलीस पोहचण्याआधी बाजारपेठेतील नागरिकांनी आरोपीला चांगलाच चोप दिला होता. पोलिसांनी मध्यस्थी करत आरोपीला नागरिकांच्या तावडीतून सोडवले. आणि चौकशीसाठी पोलीस ठाण्यात घेऊन गेले.

पोलीस तपासादरम्यान धक्कादायक माहिती समोर आली आहे. मृत तरुणी तिच्या आत्येभावासोबत बाहेर गेली असल्याचं पीडितेच्या बहिणीने संगीतल. आरोपी बऱ्याचदिवसापासून पीडितेकडे लग्नाची मागणी करत होता. मात्र पीडितेने त्याला वारंवार नकार दिला. हा नकार चवताळलेल्या प्रियकराला पचवता न आल्याने त्याने पीडितेला जबरदस्तीने लग्न करण्यास भाग पाडले. पीडितेने पळून जाण्याचा प्रयत्न केला तेव्हा आरोपीने तिचा पाठलाग केला, तिला पकडले आणि धारदार शस्त्राने तिच्या छातीवर हल्ला केला.

या हल्ल्यात तरुणी गंभीर जखमी झाली. जखमी झालेल्या पीडितेला रुग्णालयात दाखल करण्यात आले. मात्र डॉक्टरांनी तिला मृत घोषित केले. पोलिसांनी आरोपी भावाच्या मुसक्या आवळल्या असून गुन्हा दाखल करण्यात आला आहे. आरोपीला कठोरातील कठोर शिक्षा व्हावी अशी पीडितेच्या कुटुंबीयांनी मागणी केली आहे. दरम्यान या पिडीतेला न्याय मिळणार का ? हे पाहणं महत्त्वाचं ठरेलं.