Bihar Politics Number Game:

बिहारमध्ये मागील काही दिवसांपासून राजकीय वातावरण तापलं आहे. जनता द युनायटेड(जेडीयू) भारतीय जनता पार्टीसोबत सत्ता स्थापन करणार असल्याची चर्चा सुरू झालीय. दोन्ही पक्षात सर्व बाबींवर चर्चा झाली असून फक्त अधिकृत घोषणा बाकी असल्याचं म्हटलं जात आहे. नितीश कुमार महाआघाडी सरकारच्या मुख्यमंत्रिपदाचा राजीनामा देऊन २८ जानेवारी रोजी एनडीए सरकारमध्ये सामील होणार आहेत. २९ तारखेनंतर मुख्यमंत्री म्हणून पद आणि गोपनीयतेची शपथ घेऊ शकतात. दरम्यान बिहारमध्ये सत्तेसाठी आकड्याचा खेळ कसा साधला जाणार हे आपण समजून घेऊ.. (Latest News)

बिहारची राजधानी पाटण्यात राजकीय वातावरण तापलं असून बैठकांचं सत्र सुरू झालंय. जेडीयूने आपल्या सर्व आमदारांना तात्काळ पाटण्याला पोहोचण्यास सांगितले आहे. तर दुसरीकडे लालू यादव यांच्या नेतृत्वाखालील राष्ट्रीय जनता दल (आरजेजेडी) देखील सक्रिय मोडमध्ये आले आहे. आरजेडीने राबडी देवी यांच्या निवासस्थानी आमदारांची तातडीची बैठक बोलावली आहे. नितीश कुमार यांनी साथ सोडल्यानंतरही सरकार कसं वाचवण्यात येईल, अशा संभाव्य पर्यायांवर विचारमंथनही या बैठकीत केले जात आहेत.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

सत्ता राखण्यासाठी लालू प्रसाद यादव यांनी हिंदुस्थानी अवाम मोर्चाशी चर्चा केलीय. हम पार्टीचे अध्यक्ष जीतन राम मांझी हे एकेकाळी महाआघाडीचा भाग होते. मिळालेल्या माहितीनुसार, लालूंनी मांझी यांना त्यांचा मुलगा संतोष मांझी यांना उपमुख्यमंत्री करण्याची ऑफरही दिलीय. दरम्यान संतोष मांझी यांनी हे वृत्त फेटाळून लावले आहे. आण एनडीएसोबत आहोत, आणि एनडीएसोबतच राहणार असल्याचं म्हटलं आहे.

असा आहे आकड्याचा खेळ

बिहारच्या २४३ सदस्यांच्या विधानसभेसाठी १२२ आमदारांचे बहुमत आवश्यक असते. लालू यादव यांच्या नेतृत्वाखालील आरजेडी (RJD)७९ सदस्यांसह बिहार विधानसभेत सर्वात मोठा पक्ष आहे. तर भाजप ७८ आमदारांसह दुसऱ्या क्रमांकावर आहे. दोन्ही पक्षांकडे बहुमत नाहीये. नितीश कुमार यांचा पक्ष जेडीयू आघाडीतून बाहेर पडले तर काँग्रेसकडे १९, तर डाव्या पक्षाकडे १६ आमदार आहेत.

RJD,काँग्रेस आणि डाव्यांच्या आमदारांची संख्या जोडली तर एकूण सदस्य संख्या ११४ वर पोहोचते. यामुळे बहुमतासाठी ८ अंक कमी आहेत. भाजपकडे ७८ आमदार आहेत. जीतन राम मांझी यांच्या नेतृत्वाखालील हम पक्षाचे चार आमदार आहेत. नितीशकुमार यांच्याकडे आमदारांची संख्या ८२ वर पोहोचते. असदुद्दीन ओवेसी यांच्या पक्षातही एक आमदार आहे जो एनडीएमध्ये किंवा महाआघाडीतही नाही.

एनडीए असो वा महाआघाडी, नितीश कुमार यांचा पक्ष कुठलाही मार्ग पत्करला तरी सहज सरकार स्थापन होईल आणि वाचवता येईल. पण आता प्रश्न असा आहे की विधानसभेच्या आकड्यांच्या खेळात नितीश यांनी एनडीएची बाजू घेतल्यानंतरही आरजेडीला सरकार स्थापनेची आशा का आणि कशी आहे?