पाटणामधील बुद्ध कॉलनीमध्ये जन सुराज पक्षाच्या नगरसेविकेच्या पतीवर गोळीबार झाल्याची घटना घडलीय. ज्ञानवती देवी असं जन सुराज पक्षाच्या नगरसेविकेचं नाव असून त्यांचे पती माजी नगरसेवक अनिल यादव यांच्यावर जीवघेणा हल्ला झाल्यानं परिसरात खळबळ उडालीय. गेल्या काही दिवसापासून बिहारची राजधानी पाटण्यात गुंडांनी धुमाकूळ घातलाय. दररोज गुन्ह्याची घटना घडत असल्यानं गुंडांना कायद्याचा धाक राहिला नसल्याचं चित्र आहे.

मिळालेल्या माहितीनुसार, अनिल यादव हे त्यांच्या 'मा सुखिया महल' या अपार्टमेंट कॉम्प्लेक्सच्या पार्किंग परिसरात बसले होते. तेव्हा दोन दुचाकीवरून आलेल्या तीन बुरखाधारी हल्लेखोर तेथे आले. त्यावेळी अनिल यादव यांना परिस्थितीचा अंदाज येण्याआधीच हल्लेखोरांनी त्यांच्यावर बेछूट गोळीबार केला. अनिल यादव यांना चार ते पाच गोळ्या लागल्या, ज्यामुळे ते जागीच कोसळले. गोळीबारानंतर तिन्ही हल्लेखोरांनी हवेत बंदुका मिरवत घटनास्थळावरून पळ काढला.

प्रशांत किशोर यांनी घेतली भेट; माजी नगरसेवकाची प्रकृती चिंताजनक

गोळीबाराचा आवाज ऐकून स्थानिक नागरिक आणि कुटुंबीयांनी अनिल यादव यांच्याकडे धाव घेतली. त्यांना तातडीने बोरिंग रोडवरील 'उदयन हॉस्पिटल'मध्ये दाखल केले. डॉक्टरांच्या म्हणण्यानुसार, अनिल यादव यांची प्रकृती अत्यंत चिंताजनक असून ते आयसीयू (ICU) मध्ये मृत्यूशी झुंज देत आहेत.

या घटनेची माहिती मिळताच, जन सुराज पक्षाचे प्रमुख प्रशांत किशोर यांनी अनिल यादव यांच्या प्रकृतीची विचारपूस करण्यासाठी उदयन् रुग्णालयाला भेट दिली. त्यांनी त्यांच्या कुटुंबीयांची भेट घेऊन त्यांना धीर दिला. घटनेची माहिती मिळताच पोलीस आणि वरिष्ठ अधिकारी तातडीने घटनास्थळी दाखल झाले.