हैद्राबाद : हैद्राबाद मधील प्रसिद्ध असणाऱ्या बाळापूर गणेश लाडूचा आज लिलाव पार पडला. या खुल्या लिलावात २१ किलोच्या लाडूसाठी एका व्यापाऱ्याने व तेलंगणातील विधानपरिषद आमदार रमेश यादव यांनी तब्बल १८.९० लाख रुपये मोजले आहेत. एवढ्या प्रचंड किमतीला हा लाडू खरेदी करून बोली जिंकल्याने त्यांनीं आनंद देखील व्यक्त केला आहे. मात्र, २१ किलोच्या लाडवासाठी जवळपास १९ लाख रुपये मोजल्याने अनेकांच्या भुवया उंचावल्या आहेत.

हे देखील पहा :

तेलंगणातील नाडरगुल येथील व्यापारी असणाऱ्या मेरी शशांक रेड्डी व रमेश यादव यांनी हा लाडू आंध्र प्रदेशचे मुख्यमंत्री वाय एस जगन मोहन रेड्डी यांना भेट दिला आहे. या लाडूसाठी १,११६ रुपयांपासून बोली सुरू झाली आणि काही मिनिटांतच लाखो रुपयांच्या घरात पोहचली.

गेल्या वर्षी, २०२० मध्ये कोरोना संसर्गाच्या पार्श्वभूमीवर बाळापूर गणेश लाडू लिलाव पार पडू शकला नव्हता. २०१९ मध्ये पार पडलेल्या लिलावात याच लाडूसाठी सर्वाधिक १७.६० लाखाची बोली लागली होती. बाळापूर लाडू लिलावाला २४ वर्षांची परंपरा असून, गणेश विसर्जनाच्या दिवशी या लाडूचा लिलाव करण्यात येत असतो. १९९४ मध्ये पहिला लिलाव पार पडला होता. त्यावर्षीच्या लिलावात ४५० रुपयांची बोली लावण्यात आली होती.

Edited By : Krushnarav Sathe