American Airlines Pee-gate Case: विमानांमध्ये सहप्रवाशांवर लघुशंका केल्याची आणखी एक घटना समोर आली आहे. अमेरिकन एअरलाइन्सच्या विमानाने न्यूयॉर्कहून दिल्लीला जाणाऱ्या एका भारतीय नागरिकाला त्याच्या सहप्रवाशावर लघुशंका केल्याच्या आरोपाखाली पोलिसांनी ताब्यात घेतलं आहे, अशी माहिती अधिकृत सूत्रांनी सोमवारी दिली.

एअरलाइन्सच्या कर्मचाऱ्यांच्या म्हणण्यानुसार, आरोपी भारतीय प्रवाशी हा मद्यधुंद अवस्थेत असल्याने ही घाट घडली आहे. त्याच्याच काही कारणामुळे वाद झाल्याने त्याने सहप्रवाशावर लघुशंका केली, असं सांगितलं जात आहे.

अमेरिकन एअरलाइन्सच्या AA 292 या विमानात ही घटना घडली. विमान इंदिरा गांधी आंतरराष्ट्रीय (IGI) विमानतळावर उतरल्यानंतर केंद्रीय औद्योगिक सुरक्षा दलाच्या (CISF) जवानांनी रविवारी रात्री 9 च्या सुमारास आरोपीला ताब्यात घेतलं आहे.

विमान कंपनीने लँडिंगपूर्वी दिल्ली विमानतळाला घटनेची माहिती दिली. त्यानंतर केंद्रीय औद्योगिक सुरक्षा दलाने कारवाई करत दोन्ही प्रवाशांना चौकशीसाठी ताब्यात घेतलं. सीआयएसएफने दोघांनाही दिल्ली पोलिसांच्या ताब्यात दिले. सूत्रांनी सांगितले की, पीडित प्रवाशाने याप्रकरणी तक्रार दाखल केली आहे.

दरम्यान, विमानात प्रवास करताना मद्य प्राशन केल्यानंतर काही प्रवाशांनी सहप्रवाशांवर लघुशंका केल्याच्या घटना अलीकडच्या काळात समोर आल्या आहेत.

गेल्या वर्षी २६ नोव्हेंबरला एअर इंडियाच्या विमानात अशीच एक घटना समोर आली होती. त्यावेळी न्यूयॉर्क-दिल्ली विमानाच्या बिझनेस क्लासमध्ये एका मद्यधुंद व्यक्तीने महिला सहप्रवाशावर लघुशंका केल्याचा आरोप आहे.