आंध्र प्रदेशमध्ये धक्कादायक घटना घडली आहे. एका तरुणाने ट्रान्सजेंडरसोबत लग्न केल्यामुळे त्याच्या आई-वडिलांनी आपले जीवन संपवलं. मुलाचे ट्रान्सजेंडरसोबतचे प्रेमसंबंध आई-वडिलांना मान्य नव्हते. या तरुणाने ट्रान्सजेंडरसोबत लग्न करण्याची देखील इच्छा व्यक्त केली. त्याने इतर आई-वडिलांच्या पसंतीच्या मुलीसोबत लग्न करण्यास नकार दिला. समाजामध्ये आपली बदनामी होईल त्यामुळे दोघांनीही टोकाचे पाऊल उचलत आत्महत्या केली.

मिळालेल्या माहितीनुसार, आंध्र प्रदेशच्या नांदयालमध्ये ही घटना घडली. याठिकाणी राहणाऱ्या इंजिनिअरिंगचे शिक्षण घेतलेल्या तरुणासाठी त्याचे आई-वडिल मुलगी शोधत होते. इंजिनिअरचे शिक्षण घेतले असून सुद्धा तो रिक्षा चालवत होता. आपल्या एकुलत्या एका मुलाचं चांगलं व्हावं यासाठी आई-वडील प्रयत्न करत होते. त्यांनी आपल्या मुलीसाठी एक मुलगी देखील पाहिली होती. पण या तरुणाने त्या मुलीसोबत लग्न करण्यास नकार दिला.

या तरुणाचे एका ट्रान्सजेंडरशी प्रेमसंबंध होते. गेल्या ३ वर्षांपासून या दोघांमध्ये प्रेमसंबंध होते. त्याने तिच्यासोबत लग्न करणार असल्याचे आई-वडिलांना सांगितले होते. मुलाचे हे बोलणं ऐकून त्याच्या आई-वडिलांना मोठा धक्का बसला. त्यांनी आपल्या मुलाला ट्रान्सजेंडरसोबत लग्न करण्यास नकार दिला. या तरुणाच्या आई-वडिलांनी किटकनाशक पिऊन आत्महत्या केली.

टाईम्स ऑफ इंडियाच्या वृत्तानुसार, मुलाने ट्रान्सजेंडरसोबत प्रेमसंबंध असल्याचे सांगितल्यानंतर आई-वडिलांनी त्यांना स्थानिक पोलिस ठाण्यात नेले होते आणि पोलिसांना त्यांची काऊंसलिंग करण्यास सांगितले होते. ऐवढं करून ही मुलाचे मन वळवण्यात ते अपयशी ठरले. तरुणाने आई-वडिलांनी निवड केलेल्या मुलीसोबत लग्न करण्यास नकार दिला. त्याने मी ट्रान्सजेंडरसोबतच लग्न करणार असल्याचे स्पष्टपणे सांगतिले.

त्यानंतर निराश झालेल्या आई-वडिलांनी समाजामध्ये आपली बदनामी होईल म्हणून किटकनाशक पिऊन आत्महत्येचा प्रयत्न केला. तरुणाच्या आई-वडिलांना तात्काळ रुग्णालयात दाखल केले पण उपचारापूर्वी त्यांचे निधन झाले. या घटनेनंतर धक्कादायक माहिती समोर आली आहे. तरूणाच्या ट्रान्सजेंडर प्रेयसीच्या जवळच्या असणाऱ्या ट्रान्सजेंडर समूहाने त्याच्या आई-वडिलांना त्रास दिला होता.