विजयवाडा: आंध्र प्रदेशातील कृष्णा जिल्ह्यातील गुडीवाडा शहरातून एक धक्कादायक प्रकरण समोर आले आहे, तिथे एका ३० वर्षीय महिलेवर १५ वर्षाच्या मुलाचे अपहरण करून लैंगिक संबंध ठेवल्याचा आरोप आहे. ही महिला मुलासोबत राहून शारीरिक संबंध ठेवण्याच्या उद्देशाने पळून गेली होती. पोलिसांनी (Police) हैदराबादमधून एका घरातून त्या मुलाला आणि महिलेला ताब्यात घेतले. १९ जुलै रोजी आठवीत शिकणाऱ्या एका १५ वर्षीय मुलाने त्याच्या पालकांना मित्रांना भेटायला जात असल्याचे सांगून गेला होता. त्यानंतर रात्री उशिरापर्यंत तो घरी परतला नाही. मुलगा घरी न आल्यानंतर त्याच्या पालकांनी तक्रार दिली.

पोलिसांनी (Police) दिलेली माहिती अशी, तो अल्पवयीन घरी परतला नाही म्हणून कुटुंबीयांनी आजूबाजूच्या लोकांजवळ चौकशी केली. यानंतर त्यांच्या शेजारी राहणारी एक महिला देखील बेपत्ता असल्याचे समजले. महिलेनेच मुलाचे अपहरण केल्याचा संशय मुलाच्या कुटुंबीयांना आल्याने कुटुंबीयांनी पोलीस ठाणे गाठले. यानंतर महिलेच्या विरोधात पोलिसांत तक्रार दाखल करण्यात आली. गुन्हा दाखल केल्यानंतर पोलिसांनी विशेष पथक तयार करून या प्रकरणाचा तपास सुरू केला. दरम्यान, मंगळवारी पोलिसांना माहिती मिळाली की, ही महिला एका अल्पवयीन मुलासोबत हैदराबाद येथील एका खोलीत भाड्याने राहत आहे.

यानंतर पोलिसांनी (Police) घटनास्थळ गाठून दोघांना ताब्यात घेतले. ही महिला त्या मुलाकडे आकर्षित झाली होती, आणि अपहरण करण्यापूर्वीच ती तिच्या घरी त्या मुलाशी शारीरिक संबंध ठेवत होती, अशी माहिती पोलिसांनी दिली.