गुजरातमधील अहमदाबाद येथे एअर इंडियाचे प्रवासी विमान कोसळले. हे विमान अहमदाबादहून लंडनला जात होते. विमानाने टेकऑफ केले, ७०० फूटावर गेल्यानंतर अवघ्या काही मिनिटांमध्ये विमान खाली कोसळले. अहमदाबादच्या मेघानीनगर परिसरात विमान कोसळले. अपघात झाल्यानंतर लगेचच पोलीस, आपत्कालीन पथके घटनास्थळी पोहोचले.

अपघातग्रस्त एअर इंडियाच्या विमानात सावजीभाई टिंबडिया नावाचे प्रवासी लंडनला जात होते. पण काही कारणांमुळे त्यांनी प्रवास न करण्याचा निर्णय घेतला. 'माझा मुलगा लंडनमध्ये राहतो. मी त्याला भेटायला निघालो होतो. पण आजचा दिवस मला आवडला नाही म्हणून मी तिकीट कॅन्सल केले आणि पुढच्या सोमवारचे तिकीट बुक केले', अशी माहिती सावजीभाईंनी माध्यमांना दिली.

'मला तीन-चार दिवसांनी जायचे आहे. मी सोमवारच्या फ्लाइटचे तिकीट बुक केले आहे. आज जाणाऱ्या विमानाचे तिकीट देखील माझ्याकडे होचे. पण आज मला जावेसे वाटत नव्हते. आतून आवाज आला की आज जाऊ नको. मला वाटले आजचा दिवस चांगला नाही. म्हणून मी आज विमानाने प्रवास न करण्याचा निर्णय घेतला, माझा सीट नंबर ए१ होता', अशी वक्तव्य सावजीभाई टिंबडिया यांनी केले.

सावजी टिंबडिया म्हणाले, 'मला कळले आजच्या ज्या विमानाचे तिकीट माझ्याकडे होते, त्या विमानाचा अपघात झाला. मी एकटाच लंडनला जाणार होता. मला स्वामी नारायणाने वाचवले आहे. मी भगवान स्वामी नारायणाचा भक्त आहे. मी दररोज मंदिरात जातो. त्यांच्यामुळे माझे प्राण वाचले, मी आता पुढच्या सोमवारी मुलाकडे जाईन.'