अहमदाबाद विमान दुर्घटनेनंतर एअर इंडियाच्या दुसऱ्या विमानाला बॉम्बची धमकी मिळाल्याने खळबळ उडाली आहे. थायलंडमधील फुकेट येथून नवी दिल्लीकडे येणाऱ्या AI-379 या विमानाला शुक्रवारी आपत्कालीन लँडिंग करावं लागलं. सुरक्षेच्या दृष्टीने घेतलेल्या तात्काळ निर्णयामुळे विमान सुरक्षितपणे फुकेट विमानतळावर उतरवण्यात आलं असून, विमानातील १५६ प्रवासी आणि सर्व क्रू सदस्य सुरक्षित असल्याची माहिती समोर आली आहे.

प्राथमिक माहितीनुसार, थायलंडमधील फुकेट येथे एअर इंडियाच्या विमानाचे आपत्कालिन लँडिंग करण्यात आलं आहे. हे विमान फुकेटहून नवी दिल्लीला येत होते. परंतु, बॉम्बच्या धमकीनंतर आपत्कालीन लँडिंग करावे लागले.

रॉयटर्सच्या वृत्तानुसार, एअर इंडियाचे विमान एआय ३७९ हे फुकेटहून नवी दिल्लीला निघाले होते. त्यात १५६ प्रवासी होते. परंतु, उड्डाणानंतर बॉम्बची धमकी देण्यात आली. त्यानंतर, विमान अंदमान समुद्राभोवती प्रदक्षिणा घालून परत आले. तसेच आपत्कालीन लँडिंग करण्यात आले. एओटीने अद्याप बॉम्बच्या धमकीची पुष्टी केलेली नाही.

फुकेट विमानतळावरील एका अधिकाऱ्याने सांगितले की, आपत्कालीन लँडिंगनंतर प्रवाशांना विमानातून बाहेर काढण्यात येत आहे. सर्वजण सध्या सुरक्षित आहे.

अहमदाबादमध्ये एअर इंडियाचे विमान कोसळले

गुरूवारी अहमदाबादमध्ये २४२ जणांना घेऊन जाणारे एअर इंडियाचे विमान कोसळले. या अपघातात माजी मुख्यमंत्री विजय रूपाणी आणि इतर २४१ जणांचा मृत्यू झाला. पंतप्रधान नरेंद्र मोदी शुक्रवारी सकाळी अपघातस्थळी पोहोचले. त्यांनी मृतांच्या नातेवाईकांची भेट घेतली आहे. तसेच यासंदर्भात बैठक घेणार आहेत.