Pakistan Afghanistan conflict : पाकिस्तान आणि अफगाणिस्तान यांच्यातील संघर्ष आणखी वाढला असून युद्ध होण्याची शक्यता वर्तवण्यात येत आहे. गेल्या आठवड्यात पाकिस्तानने अफगाणिस्तानच्या काही प्रांतांवर हवाई हल्ला केला होता. त्याला गुरूवारी रात्री अफगाणिस्तानकडून प्रत्युत्तर देण्यात आलेय. अफगाणिस्तानने पाकिस्तानच्या १५ चौक्यांवर कब्जा केल्याचा दावा करण्यात आला आहे. अफगाणिस्तानच्या हल्ल्यात पाकिस्तानच्या ५५ सैनिकांचा मृत्यू झाल्याचा दावा तालिबानकडून कऱण्यात आला आहे. तर पाकिस्तानकडून दावा खोडून काढण्यात आला असून फक्त २ सैनिकांचा मृत्यू झाल्याचे सांगण्यात आले आहे. टोलो न्यूजच्या वृत्तानुसार, अपगाणिस्तानने पाकिस्तानचे जेएफ १७ विमान पाडल्याचा दावा केला आहे.

गेल्या आठवड्यात झालेल्या पाकिस्तानी हल्ल्याचा बदला म्हणून अफगाणिस्तानकडून गुरूवारी रात्री कारवाई करण्यात आली. टोलो न्यूजने अफगाण सुरक्षा दलांच्या हवाल्याने वृत्त दिले आहे की अफगाण सैन्याने अफगाण हवाई हद्दीत घुसखोरी करणारे पाकिस्तानी विमान पाडले आहे. तालिबानशी संबंधित अनेक माध्यमांनी पाकिस्तानी विमान पाडल्याचा दावा केला आहे. तालिबानच्या हवाई संरक्षण यंत्रणेने पाकिस्तानी विमानाला धडक दिली असावी, असेही म्हटलेय.

ड्युरंड सीमेजवळील पाकिस्तानी लष्करी सरकारी चौक्यांविरुद्ध अफगाण सैन्याने प्रतिहल्ला केला. आतापपर्यंत पाकिस्तानच्या १५ चौक्या ताब्यात घेण्यात आले आहेत. या कारवाईत ५५ पाकिस्तानी सैनिक मारले गेले. अफगाण सैन्याने अनेक पाकिस्तानी सैनिकांचे मृतदेह ताब्यात घेतले आहेत. तालिबाननेही अनेक पाकिस्तानी सैनिकांना जिवंत पकडल्याचा दावा केला आहे. लष्करप्रमुख फसिहुद्दीन फितरत यांच्या आदेशावरून पाकिस्तानवर हल्ला केला होता.

रात्रभर लढाई सुरूच

अफगाण सैन्याने पाकिस्तान सैन्याचे २ मुख्यालय आणि १९ चेकपोस्ट ताब्यात घेतल्याचा दावा अफगाणिस्तान संरक्षण मंत्रालयाने केला आहे. या कारवाईत ८ अफगाण सैनिक "शहीद" झाले आणि इतर ११ जण जखमी झाल्याचेही सांगण्यात आले आहे. तोरखममधील परत आलेल्यांसाठी असलेल्या तात्पुरत्या छावणीवर पाकिस्तानी सैन्याने केलेल्या हवाई हल्ल्यात महिला आणि मुलांसह १३ जण जखमी झाले आहेत.