उत्तर प्रदेशातून धक्कदायक बातमी समोर आली आहे. अमरोहा येथील राष्ट्रीय महामार्ग ९ वर एक भीषण अपघात झाला. या दुर्दैवी अपघातात ४ डॉक्टरांचा मृत्यू झाला आहे. मेरठहून गाझियाबादला परत येताना ४ वैद्यकीय शिक्षण घेणाऱ्या डॉक्टरांची भरधाव कार ट्रकला आदळल्याने हा अपघात झाल्याचे म्हटले जात आहे. हा अपघात रजबपूर आणि अत्रासी दरम्यान घडला असून या घटनेचा पोलीस तपास करत आहेत.

मिळालेल्या माहितीनुसार, अपघातात मृत झालेले चारही डॉक्टर एकाच विद्यापीठातले होते. ते मेरठहून गाझियाबादला परतत होते. यादरम्यान अमरोहा जिल्ह्यातील राजबपूर पोलीस स्टेशन परिसरात रात्री १० वाजताच्या सुमारास एका भरधाव कारने रस्त्याच्या कडेला उभ्या असलेल्या डीसीएमला धडक दिली.

ही धडक इतकी भीषण होती की कारचा चक्काचूर झाला. या दुर्दैवी अपघातात कारमध्ये बसलेल्या चार तरुणांचा जागीच मृत्यू झाला. मृतांमध्ये चारही जण राजबपूर पोलीस स्टेशन परिसरातील श्री वेंकटेश्वर विद्यापीठाचे वैद्यकीय विद्यार्थी असल्याचे सांगितले जात आहे. शिवाय या अपघातानंतर डीसीएम चालक घटनास्थळावरून पळून गेला. या घटनेची माहिती मिळताच पोलिस पथक घटनास्थळी पोहोचले आणि त्यांनी कारमध्ये अडकलेले मृतदेह बाहेर काढले. हे मृतदेह शवविच्छेदनासाठी पाठवण्यात आले आहेत.

शिवाय अपघातग्रस्त वाहनांना क्रेनच्या सहाय्याने बाजूला करण्यात आले आहे. या अपघाताचे मूळ कारण अद्याप समोर आले नसून हा अपघात भीषण असून पोलीस या घटनेचा पुढील तपास करत आहेत. रस्त्याच्या कडेला उभ्या असलेल्या गाड्यांची धडक होऊन अपघात होण्याची ही पहिलीच घटना नाही. यापूर्वीही असा प्रकार अनेक वेळा घडला आहे. रस्त्याच्या कडेला गाड्या पार्क करणाऱ्यांवरही पोलिस कारवाई करतात, परंतु अशा घटना कमी होताना दिसत नाहीत.