नवी दिल्ली - नव्या वर्षाच्या पहिल्याच दिवशी दिल्लीतून एक दुर्दैवी बातमी समोर आली आहे. दिल्लीतील ग्रेटर कैलास भागातील एका नर्सिंग होमला रविवारी सकाळी भीषण आग लागली. या अपघातात दोन जणांचा होरपळून मृत्यू झाल्याची माहिती समोर आली आहे. त्याचवेळी आगीच्या विळख्यातून 6 जणांना वाचवण्यात यश आले आहे.

आगीची माहिती मिळताच अग्निशमन दलाच्या ४ गाड्या घटनास्थळी दाखल झाल्या आणि तासाभराच्या प्रयत्नानंतर आग आटोक्यात आणण्यात यश आले. सध्या परिस्थिती नियंत्रणात आहे. आधी भूकंपाचे धक्के आणि आता आग लागल्याने दिल्लीकरांमध्ये भीतीचं वातावरण पसरलं आहे.

ग्रेटर कैलास पार्ट 2 येथील नर्सिंग होममध्ये भीषण आग लागली. आगीची माहिती अग्निशमन विभागाला पहाटे 5.14 वाजता देण्यात आली. अग्निशमन दलाच्या चार गाड्यांनी आग आटोक्यात आणली आहे. या आगीत दोन ज्येष्ठ नागरिक महिलांचा मृत्यू झाला, त्यांचे वय ९२ आणि ८२ वर्षे असल्याचे सांगण्यात येत आहे. याशिवाय एकाची प्रकृती चिंताजनक आहे. ही आग अत्यंत भीषण होती. धूर आणि आगीचे लोळ पाहून आजूबाजूचे लोकही धास्तावले. काही लोकांनी आग विझवण्याचा प्रयत्न केला.