• तामिळनाडूमध्ये २४ वर्षीय नवविवाहितेचा दुर्दैवी मृत्यू

• मंदिराजवळ माकडांना फळे खाऊ घालताना घडली घटना

• माकडांना घाबरून पळत असताना तोल जाऊन ती दरीत पडली

• पोलिस आणि बचाव पथकाने मृतदेह बाहेर काढून तपास सुरू केला

तामिळनाडूमध्ये २४ वर्षीय नवविवाहित महिलेचा दुर्दैवी मृत्यू झाला. डोंगरावरून दरीत पडून या महिलेचा मृत्यू झाला. तामिळनाडूच्या तुतीकुडी जिल्ह्यामध्ये शुक्रवारी सायंकाळच्या सुमारास ही घटना घडली. ही महिला देवदर्शनासाठी मंदिरात गेली होती. ती डोंगराजवळ माकडांना फळे खायला घालत होती. त्याचवेळी माकडांच्या कळपाने तिला घेरलं. त्यामुळे ती प्रचंड घाबरली आणि पळत असताना ती पाय घसरून दरीत पडली. या घटनेत गंभीर जखमी झालेल्या महिलेचा मृत्यू झाला.

मिळालेल्या माहितीनुसार, तुतीकुडी जिल्ह्यातील कोविलपट्टीतील दक्षिण थिट्टनकुलम भागामध्ये ही महिला राहत होती. अनिता असे या महिलेचे नाव होते. मागच्या महिन्यामध्ये तिचे २९ वर्षीय सुरेशसोबत लग्न झाले होते. सुरेश विदेशामध्ये काम करत होता. नुकताच तो घरी परत आला होता. दोघेही देवदर्शनासाठी कजुगुमलाई येथील कलुगासलमूर्ति मंदिरात गेले होते. त्यावेळी ही भयंकर घटना घडली आणि लग्नाच्या एका महिन्यामध्येच अनिताचा दुर्दैवी मृत्यू झाला.

मुख्य मंदिरात पूजा केल्यानंतर अनिता आणि तिचा नवरा सुरेश टेकडीवरील उचिप्पिल्लैयार मंदिरात गेले. पोलिसांनी सांगितले की, ते माकडांना फळे खाऊ घालत असताना अचानक तिथे अनेक माकडं त्यांच्याभोवती जमा झाली. त्यावेळी अनिता माकडांना पाहून घाबरली. ती त्याठिकाणावरून पळून जात असताना अचानक तिचा तोल गेला आणि टेकडीवरून ती खाली पडली. या घटनेत गंभीर जखमी झालेल्या अनिताचा मृत्यू झाला. अनिताच्या मृत्यूनंतर तिच्या नवऱ्याला मोठा धक्का बसला. घटनास्थळावर तो जोरजोरात रडत होता.

कझुगुमलाई अग्निशमन आणि बचाव पथकाने आणि पोलिसांनी अनिताचा मृतदेह दरीतून बाहेर काढत ताब्यात घेऊन शवविच्छेदनासाठी रुग्णालयात पाठवला आहे. पोलिसांनी गुन्हा दाखल केला असून या घटनेचा तपास करत आहेत. माकडांना घाबरून अनिता टेकडीवरून खाली पडली तरी देखील आम्ही योग्य पद्धतीने या घटनेचा तपास करत आहोत, अशी माहिती पोलिस अधिकाऱ्याने दिली.