मुंबईमधील मुलुंडमध्ये एक अत्यंत धक्कादायक घटना घडली आहे. येथे एका महिलेने पार्किंगवरून झालेल्या भांडणातून विनयभंगाच्या गुन्ह्याची धमकी दिल्याने भीतीपोटी एका ६७ वर्षीय वृद्धाने आपलं जीवन संपवल्याची घटना घडली आहे.

खुशाल दंड, असे या मयत जेष्ठ नागरिकाचे नाव आहे. आरपीचे नाव कुमकुम, असं आहे. याप्रकरणी पोलिसात गुन्हा दाखल करण्यात आला असून पोलिसांनी आरोपीला अटक केली आहे.

मिळालेल्या माहितीनुसार, मयत खुशाल दंड आणि या प्रकरणातील आरोपी कुमकुम या मुलुंडच्या मनीशा प्राईड इमारतीमध्ये राहतात. त्यांची काही दिवसांपूर्वी पार्किग वरुन वाद झाला होता. यात कुमकुमने दंड यांना मारहाण करीत धमकावले होते. यानंतर दंड यांनी मुलुंड रेल्वे स्थानकाजवळ लोकल खाली आत्महत्या केली.

या प्रकरणी दंड यांच्या पत्नीच्या तक्रारीवरून कुमकुम मिश्राच्या विरोधात आत्महत्येस प्रवृत्त केल्याचा गुन्हा मुलुंड पोलिसांनी दाखल केला. यानंतर पोलिसांनी कुमकुमला अटक केली. त्यांनतर तिची जामिनावर मुक्तता झाली.

पार्किंग सारख्या शुल्लक कारणावरून झालेले भांडण, त्यात महिलेने विनयभंग केल्याची दिलेली धमकी, यामुळे धक्का बसलेल्या दंड यांनी आत्महत्या करुन जीवन संपविले. मात्र त्यांच्या घरी त्यांची पत्नी आता एकटी आहे. यामुळे या परिसरात शोककळा आणि संताप व्यक्त होत आहे.