पुणे : प्रसिद्ध बांधकाम व्यावसायिक डी.एस. कुलकर्णी (D. S Kulkarni) यांना मोफा प्रकरणात पुणे न्यायालयाने जामीन मंजूर केला. डीसके यांच्यावर मार्च २०१९ मध्ये अटकेची कारवाई करण्यात आली होती. परंतु, आता त्यांना न्यायालयाने जामीन मंजूर (Bail Granted) केल्याने त्यांची तुरुंगातून सुटका होणार का ? याकडे सर्वांचे लक्ष लागले आहे. ग्राहकांकडून अनामत रक्कम घेवून त्यांना फ्लॅटचा ताबा दिला नाही, अशा आरोपाखाली डीएसके यांच्यावर गुन्हा दाखल करण्यात आला होता.

डीएसके आणि त्यांची पत्नी हेमंती कुलकर्णी यांनी ग्राहकांकडून आगाऊ रक्कम घेतली आणि त्यांना फ्लॅटचा ताबा देण्यात आला नाही, असा आरोप तक्रारीत करण्यात आला होता. दरम्यान, ठेवीदारांची कोट्यवधी रुपयांची फसवणूक केल्याप्रकरणी मुख्य गुन्ह्यातील आरोपी डीएसके आणि इतर आरोपी १७ फेब्रुवारी २०१८ पासून तुरुंगात आहेत. डीसके यांना जामीन मिळावा यासाठी त्यांचे वकील आशुतोष श्रीवास्तव आणि वकील रितेश येवलेकर यांनी अर्ज केला होता.परंतु हा अर्ज अजूनही सुप्रीम कोर्टात प्रलंबित आहे. त्यावर २६ जुलै रोजी सुनावणी होण्याची शक्यता आहे.