Maharashtra Weather Update News Today : राज्यातून नैऋत्य मोसमी वाऱ्यांचा परतीचा हंगाम संपल्यानंतर आता उन्हाचा चटका वाढू लागला आहे. पावसाने उघडीप दिल्याने अनेक भागांत तापमानात वाढ जाणवत असून, ऑक्टोबर महिन्यातील उष्णतेमुळे नागरिक हैराण झाले आहेत. दिवसा कडक ऊन आणि दमट हवामानामुळे उकाड्यात वाढ होत आहे. दरम्यान, आज काही जिल्ह्यांसाठी उष्णतेचा यलो अलर्ट देण्यात आला आहे. दुसरीकडे, काही जिल्ह्यांत विजांच्या कडकडाटासह हलक्या पावसाची शक्यता हवामान विभागाने व्यक्त केली आहे.

कोकणातील सहा जिल्ह्यांना येलो अलर्ट

कोकण विभागात उन्हाचा तडाखा अधिक जाणवण्याची शक्यता आहे. पालघर, ठाणे, मुंबई, रायगड, रत्नागिरी आणि सिंधुदुर्ग या सहा जिल्ह्यांत उष्ण व दमट हवामान राहण्याचा अंदाज आहे. त्यामुळे या भागांतील नागरिकांनी सतर्क राहण्याचे आवाहन करण्यात येत आहे. उष्णतेसोबतच हवेतील आर्द्रतेचे प्रमाण वाढल्यास प्रत्यक्ष तापमानापेक्षा अधिक उकाडा जाणवू शकतो. विशेषतः दुपारच्या वेळेत उन्हाची तीव्रता अधिक जाणवण्याची शक्यता असल्याने नागरिकांनी आवश्यक ती काळजी घेणे गरजेचे आहे.

पश्चिम महाराष्ट्रात विजांसह पावसाचा अंदाज

एकीकडे राज्यात ऑक्टोबर हीटचा प्रभाव वाढत असताना, दुसरीकडे पश्चिम महाराष्ट्रातील काही भागांत पावसासाठी पोषक परिस्थिती निर्माण होण्याची शक्यता आहे. सातारा, कोल्हापूर, सांगली आणि सोलापूर या जिल्ह्यांत तुरळक ठिकाणी विजांच्या कडकडाटासह पाऊस पडण्याचा अंदाज हवामान विभागाने वर्तविला आहे.

उर्वरित महाराष्ट्रात उकाडा कायम

राज्यातील इतर भागांत अंशतः ढगाळ आकाश राहण्याची शक्यता असून, उन्हाचा चटका आणि उकाडा कायम राहण्याचा अंदाज आहे. पावसाने काही काळ विश्रांती घेतल्याने तापमानातील वाढ नागरिकांच्या अडचणी वाढवू शकते. एकूणच, महाराष्ट्रात सध्या मिश्र वातावरण पाहायला मिळत आहे.