अक्षय बडवे, पुणे प्रतिनिधी

Wagholi police officers forced to work outside due to lack of infrastructure : पुण्यात पोलीस स्टेशनमध्ये पोलिसांनाच बसायला जागा नसल्याचे धक्कादायक वास्तव समोर आले आहे. वाघोली पोलिस ठाण्यातील पोलीस अधिकारी, कर्मचारी पोलिस ठाण्याच्या बाहेर उघड्यावर खुर्ची टाकून काम करत असल्याचे विदारक चित्र समोर आलेय. ११ ऑक्टोबर २०२४ मध्ये उद्घाटन झालेल्या वाघोली पोलिस ठाण्याची परिस्थितीचे व्हिडिओ समोर आले आहेत. इमारतीची पूर्तता न झाल्याने उघड्यावर कामकाज करण्याची वेळ आल्याचे समोर आलेय. उद्धव ठाकरेंच्या शिवसेनेकडून याप्रकरणी मुख्यमंत्री देवेंद्र फडणवीस यांना पत्र पाठवण्यात आले आहे. शिवसेना उद्धव बाळासाहेब ठाकरे पक्षाचे युवासेनेचे उपजिल्हाध्यक्ष ओंकार तुपे यांनी पत्र लिहिले आहे.

मिळालेल्या माहितीनुसार, वाघोली पोलिस ठाण्याचे उद्घाटन तत्कालीन गृहमंत्री देवेंद्र फडणवीस, केंद्रीय मंत्री मुरलीधर मोहोळ यांच्या हस्ते ऑक्टोबर २०२४ मध्ये करण्यात आले होते. शहरातील सात नवीन पोलिस ठाण्याच्या उद्घाटन सोहळ्यादरम्यान वाघोली पोलिस ठाण्याचे ऑनलाइन उद्घाटन करण्यात आले होते. दरम्यान, या पोलिस ठाण्याच्या इमारतीचे काम लवकरच पूर्ण होईल अशी अपेक्षा नागरिकांना असताना अजूनही या इमारतीचे काम पूर्णत्वास न गेल्यामुळे आज ही अधिकाऱ्यांना नागरिकांच्या तक्रारी घेण्यासाठी पोलिस ठाण्याच्या आवारात अक्षरशः खुर्ची आणि टेबल टाकून बसावं लागत आहे. पोलिस ठाण्याची अपुरी जागा, छत नसलेल्या आस्थापनेच्या खाली करण्यात येणाऱ्या कामकाजाचे व्हिडिओ आता समोर आले आहेत.

आता याप्रकरणी शिवसेना उद्धव बाळासाहेब ठाकरे पक्षाच्या युवासेनेचे उपजिल्हाध्यक्ष ओंकार तुपे यांनी मुख्यमंत्री देवेंद्र फडणवीस यांना पत्र लिहिले आहे. "वाघोली पोलिस ठाण्यातील अधिकारी, कर्मचारी अतिशय हलाखीच्या परिस्थितीत काम करताना दिसतात. पोलिस कर्मचाऱ्यांना बाहेर उघड्यावर कामकाज करावे लागत असल्याचे विदारक चित्र पाहायला मिळत आहे. प्रशासनाने तत्काळ पोलिस ठाण्याची अवस्था सुधारणे गरजेचे आहे. लवकरात लवकर आपण या नवीन इमारतीच्या कामाबाबत आपण लक्ष द्याव," असं या पत्रात लिहिले आहे.

सध्या वाघोली पोलिस ठाण्याचे पोलिस निरीक्षक युवराज हांडे असून पोलिस उपायुक्त हिम्मत जाधव आहेत. पूर्वीच्या वाघोली पोलिस चौकीमधूनच पोलिस ठाण्याचा कार्यभार सुरू आहे. ही जागा कमी पडत असल्याने अधिकाऱ्यांना बाहेर बसून ch काम करावे लागत आहे. वाघोली पोलिस ठाण्याच्या हद्दीत ४ ते ५ पोलिस चौक्या असून या भागाची लोकसंख्या ३ लाखाच्या वर गेलीय.