मुंबईतील विलेपार्ले येथील नामांकित शाळेतून धक्कादायक प्रकार उघडकीस आला आहे. तीन शाळकरी मुलींचा विनयभंग झाल्याची माहिती समोर आली आहे. या प्रकरणाची माहिती समोर येताच पोलिसांनी तपासाची चक्रे फिरवली. तसेच आरोपी चालकाला बेड्या ठोकल्या आहेत. पालकांच्या तक्रारीवरून जुहू पोलिसांनी गुन्हा नोंदवला आहे. या प्रकरणाचा अधिक तपास सध्या सुरू आहे.

विलेपार्ले येथून माणुसकीला काळीमा फासणारी घटना घडली आहे. एका नामांकित शाळेतील विद्यार्थिनींसोबत विनयभंगाचा प्रकार घडला आहे. स्कूल व्हॅन चालकाने तीन शाळकरी मुलींचा विनयभंग केला आहे. तीन शाळकरी विद्यार्थिनींसोबत स्कूल व्हॅन चालकाने अश्लील वर्तन केले आहे.

मिळालेल्या माहितीनुसार, विद्यार्थिनींना व्हॅनमध्ये बसवताना चालक गैरवर्तन करायचा. तसेच चुकीच्या पद्धतीने स्पर्श करायचा. तीन शाळकरी विद्यार्थिनींनी आपल्या पालकांना याबाबत माहिती दिली. या प्रकरणाची माहिती विद्यार्थ्यांच्या पालकांना समजताच त्यांना राग अनावर झाला. सांताक्रूझ येथील महिलेनं पोलीस ठाणे गाठले. पालकांच्या तक्रारीनंतर जुहू पोलिसांनी गुन्हा नोंदवला.

पोलिसांनी तक्रारीच्या आधारे आरोपीला बेड्या ठोकल्या. त्यानंतर जुहू पोलिसांनी आरोपीला न्यायालयात हजर केलं. न्यायालयाने आरोपीला पोलीस कोठडी सुनावली. आरोपीनं आणखी कोणत्या विद्यार्थीनीचा विनयभंग केला आहे का? आरोपीवर याआधी कोणता गुन्हा दाखल होता का? याचा तपास पोलिसांकडून सुरू आहे.