संजय गडदे, साम टीव्ही

मुंबई: भारतात बेकायदेशीरपणे प्रवेश करून मुंबईतील विविध भागांत वास्तव्य करणाऱ्या कथित बांगलादेशी नागरिकांविरोधात वर्सोवा पोलिसांनी धडाकेबाज कारवाई केली आहे. चालू वर्षात वर्सोवा तसेच मुंबईतील विविध परिसरांतून तब्बल ४४ बांगलादेशी नागरिकांचा शोध घेण्यात आल्याची माहिती पोलिसांकडून देण्यात आली.

उत्तर प्रादेशिक विभागातील उत्तर परिमंडळ-१ अंतर्गत येणाऱ्या वर्सोवा पोलीस ठाण्याच्या दहशतवादविरोधी पथकाने ही कारवाई केली. पोलिसांच्या माहितीनुसार, संबंधित नागरिकांनी कोणत्याही वैध परवानगीशिवाय सीमारेषा ओलांडून भारतात प्रवेश केला आणि त्यानंतर मुंबईतील विविध भागांत वास्तव्य केले.

घुसखोरीच्या घटनांवर लक्ष ठेवून वर्सोवा पोलिसांच्या दहशतवादविरोधी पथकाने माहिती संकलित करून विविध ठिकाणी तपासणी व पडताळणीची मोहीम राबवली. या कारवाईदरम्यान ४४ बांगलादेशी नागरिकांचा शोध घेण्यात आला. त्यांच्या भारतातील वास्तव्याबाबत तसेच प्रवेशासंदर्भातील कागदपत्रांची पडताळणी करण्यात आली.

ही कारवाई अपर पोलीस आयुक्त शशी कुमार मीना, उत्तर परिमंडळ-१ चे पोलीस उपायुक्त पुरुषोत्तम कराड, वर्सोवा विभागाचे सहाय्यक पोलीस आयुक्त ज्ञानेश्वर आवारी, वरिष्ठ पोलीस निरीक्षक दीपशिखा भाग्यश्री आव्हाड वारे आणि पोलीस निरीक्षक प्राजक्ता पवार यांच्या मार्गदर्शनाखाली करण्यात आली. दहशतवादविरोधी पथकाचे प्रमुख पोलीस उपनिरीक्षक निवास रोकडे, सचिन उगले आणि त्यांच्या पथकाने या कारवाईत महत्त्वाची भूमिका बजावली. घुसखोरीविरोधात वर्सोवा पोलिसांनी केलेल्या या कारवाईमुळे परिसरात पोलिसांच्या सतर्कतेचे दर्शन घडले आहे.